ស៊ីន យូប៊ីន ជាតារាខ្មែរដំបូងគេ ដែលបានអញ្ជើញឲ្យចូលរួមនៅក្នុងមហោស្រពភាពយន្តដ៏ធំជាងគេនៅលើពិភពលោក
សិល្ប៖ តារាសម្តែងកញ្ញា ស៊ីន យូប៊ីន ត្រូវបានគេអញ្ជើញឲ្យចូលរួមនៅក្នុងមហោស្រពភាពយន្តដ៏ធំជាងគេនៅលើពិភពលោកដែល នឹងធ្វើឡើងនៅប្រទេសអារ៉ាប៊ីសាអូឌីតនៅថ្ងៃទី០៥ ខែធ្នូ ឆ្នាំ២០២៣ ខាងមុខនេះ។
បើយោងតាមការប្រកាសតាមបណ្តាញសង្គមពីកញ្ញា ទូច បុប្ផា ប្រធានផ្នែកគ្រប់គ្រងការចាក់ផ្សាយនៃស្ថានីយទូរទស្សន៍ PNN បានឲ្យដឹងថា«នៅថ្ងៃទី០៥ ខែធ្នូ ឆ្នាំ២០២៣ ខាងមុខនេះ តារាសម្តែងភីអិនអិន កញ្ញា ស៊ីន យូប៊ីន នឹងធ្វើដំណើរទៅចូលរួមកម្មវិធី Redsea Film Festivalនៅប្រទេសអារ៉ាប៊ីសាអូឌីត ដែលកម្មវិធីមហោស្រពភាពយន្តធំជាងគេនៅលើពិភពលោក»។
គួរបញ្ជាក់ផងដែរថា នេះមិនមែនជាលើកដំបូងឡើយ ដែលតារាសម្តែងកញ្ញា ស៊ីន យូប៊ីន បានបង្ហាញវត្តមាននៅលើឆាកអន្តរជាតិល្បីៗតំណាងឲ្យអ្នកសិល្បៈខ្មែរដោយនៅក្នុងនោះ នាងធ្លាប់ដើរបង្ហាញម៉ូដសម្លៀកបំពាក់ម៉ាកល្បីៗនៅក្នុងកម្មវិធីធំមួយ នៅក្នុងទីក្រុងបារីស ប្រទេសបារាំងផងដែរ ជាពិសេសទៀតនោះ កញ្ញា ស៊ីន យូប៊ីន បានទាក់ទាញការចាប់អារម្មណ៍ ក្រោយពីនាងបង្ហាញវត្តមានម្ដងទៀតលើទឹកដីអឺរ៉ុប
ក្នុងកម្មវិធីមហោស្រពភាពយន្តទីក្រុងកានដ៏ល្បីល្បាញលើកទី៧៦ របស់បារាំង ដែលប្រមូលផ្ដុំដោយតារាល្បីៗមកពីទូទាំងពិភពលោក ។
