លោក ហ៊ុយ យ៉ាឡេង ពោលសរសើរនិងអរគុណ ស៊ីន យូប៊ីន ដែលតែងតែលើកស្ទួយអ្វីជាខ្មែរ បង្ហាញទៅអន្តរជាតិ
សិល្ប៖ ពិតណាស់តារាសម្ដែងល្បីឈ្មោះកញ្ញា ស៊ីន យូប៊ីន ត្រូវបានគេអញ្ចើញឲ្យចូលរួមក្នុងនៅមហោស្រពភាពយន្តដ៏ធំជាងគេនៅលើពិភពលោក លើទឹកដីប្រទេសអារ៉ាប៊ីសាអូឌីត កាលពីថ្ងៃទី ០៥ ខែធ្នូ ឆ្នាំ២០២៣ កន្លងទៅ តាមរយៈការបង្ហាញខ្លួនរបស់ កញ្ញា ស៊ីន យូប៊ីន នៅលើឆាកអន្តរជាតិ ដោយនាងបានគ្រងឈុតដ៏ស្រស់ស្អាត មានរំលិចនូវអក្សរ និងលេខរបស់ខ្មែរ នៅលើរ៉ូបយ៉ាងទាកទាញ ពិតជាប្លែកនិងអស្ចារ្យ ។
ទន្ទឹមគ្នានោះក៏បានឃើញគណនី Facebook របស់ផលិករល្បីឈ្មោះលោក ហ៊ុយ យ៉ាឡេង បានបង្ហោះរូបភាពរបស់ កញ្ញា ស៊ីន យូប៊ីន និងបានភ្ជាប់មកជាមួយសំណេរថា” ជាតារាខ្មែរត្រូវមានគំនិតមនសិការខ្មែរ លើកស្ទួយអ្វីជាខ្មែរ ខ្ញុំសង្កេតឃើញគាត់ បានខិតខំប្រឹងប្រែងបង្ហាញអន្តរជាតិឲ្យបានដឹងថាយើងមកពីណា នេះជាកតព្វកិច្ចដែលកូនខ្មែរគ្រប់រូបត្រូវធ្វើ ក្នុងនាមជាកូនខ្មែរត្រូវប្រឹងលើកតម្កើងជាតិយើង អរគុណយូប៊ីន និងអ្នកឆ្នៃម៉ូតនេះពិតជាប្លែកនិងអស្ចារ្យ ” ។
គួរបញ្ជាក់ផងដែរថា នេះមិនមែនជាលើកដំបូងឡើយ ដែលតារាសម្តែងកញ្ញា ស៊ីន យូប៊ីន បានបង្ហាញវត្តមាននៅលើឆាកអន្តរជាតិល្បីៗតំណាងឲ្យអ្នកសិល្បៈខ្មែរដោយនៅក្នុងនោះ នាងធ្លាប់ដើរបង្ហាញម៉ូដសម្លៀកបំពាក់ម៉ាកល្បីៗនៅក្នុងកម្មវិធីធំមួយ នៅក្នុងទីក្រុងបារីសប្រទេសបារាំងផងដែរ ជាពិសេសទៀតនោះ កញ្ញា ស៊ីន យូប៊ីន បានទាក់ទាញការចាប់អារម្មណ៍ ក្រោយពីនាងបង្ហាញវត្តមានម្ដងទៀតលើទឹកដីអឺរ៉ុប
ក្នុងកម្មវិធីមហោស្រពភាពយន្តទីក្រុងកានដ៏ល្បីល្បាញលើកទី៧៦ របស់បារាំង ដែលប្រមូលផ្ដុំដោយតារាល្បីៗមកពីទូទាំងពិភពលោក ។
