ម៉ា ច័ន្ទបញ្ញា បង្ហោះរូបភាពចាស់ៗ និងទម្លាយពីរឿងរ៉ាវដែលខ្លួនបានឆ្លងកាត់ក្នុងវិស័យសិល្បៈរយៈពេលជិត ១០ ឆ្នាំមកនេះ
សិល្ប៖ កាលពីពេលថ្មីៗកន្លងទៅនេះ តារាចម្រៀងលោក ម៉ា ច័ន្ទបញ្ញា បានបង្ហោះរូបភាពចាស់ៗរបស់លោកចំនួន ៣ សន្លឹក និងទម្លាយពីជីវិតពិតដែលបានឆ្លងកាត់អស់រយៈពេលជាច្រើនឆ្នាំក្នុងវិស័យសិល្បៈ ជាមួយនិងស្នាដៃមួយចំនួនដែលលោកបានខិតខំប្រឹងប្រែងត្រឹមឆ្នាំ២០១៨ មក និងមិនរាប់ចញ្ចូលសមិទ្ធិផលដែលបង្កើតក្នុងសម័យ Color Nine Team និង Thunn Jey នោះទេ ។
ក្នុងនោះលោកក៏បានភ្ជាប់មកជាមួយសារយ៉ាងវ៉ែងអន្លាយថា ” ជីវិតខុសគ្នាមែន! ភាពឆ្លាតខុសគ្នា ទេពកោសល្យខុសគ្នា ឱកាសខុសគ្នា វាត្រូវហើយ មិនខុសទេ ប៉ុន្តែ១០ឆ្នាំមកនេះ សម្រាប់វិស័យសិល្បៈ ទីលានដែលពោរពេញទៅដោយ គ្រាប់រំសេវនៃការសម្ដែង (ទាំងលើឆាកក្រោយឆាក ជីវិតឯកជន) ខ្ញុំតែងតែផ្ដល់យោបល់ទៅប្អូនៗជំនាន់ក្រោយថា ភាពជោគជ័យនៃវិស័យនេះ មិនឋិតឋេរទេ បើចូលទីនេះសម្រាប់តែលុយ សម្រាប់តែភាពល្បី មិនថា អ្នកខ្ពស់កប់ពពកប៉ុណ្ណាអស្ចារ្យប៉ុណ្ណា ១ម៉ោងរកបាន ២០០០ ដុល្លាជាងប៉ុណ្ណាទេ តែដល់ពេលវាស្រុត គឺវានឹងស្រុតហើយ ” ។
លោកក៏បានបន្តទៀតថា ” កុំតម្កើងឬក កុំភ្លេចពេលអត់ ពេលពិបាក ធ្វើអ្វីដែលត្រូវធ្វើ គោរពមនុស្សជុំវិញខ្លួន វាជាច្បាប់នៃការទំនាក់ទំនង ដែលជាធម្មតាគឺអាចជម្នះបានគ្រប់កាលៈទេសៈ។ ត្រូវចាំថា វិស័យនេះ សម្រាប់ប្រទេសយើង គឺវាស្រួលរកលុយ តែក៏មិនងាយស្រួលពេកដែរ។ ខ្ញុំប្រឡូកមកជិត ១០ ឆ្នាំហើយស្នាដៃ ការងារ សមរភូមិឆាកសម្ដែង ទោះមិនច្រើនដូចគេមែន តែសមល្មមម៉ាអាច ដឹកដៃអ្នកមានទេពកោសល្យម្នាក់ដល់កំពូលបាន។ខ្ញុំធ្លាប់ស្រាវជ្រាវ ធ្លាប់ជួប សិល្បករជាន់ចាស់ ថ្មី អ្នកធ្វើការមុខក្រោយឆាកទាំងអស់។ ខ្ញុំនៅតែមើលឃើញពីភាពខ្មៅងងឹត នៃរបរនេះដែលគ្រប់គ្នាយល់ថាជាឋាបសួគ៌។ ដូច្នេះហើយ សូមបងប្អូនទាំងអស់ត្រូវចាំថា ឥរិយាបថ ធ្វើការ គឺជារឿងសំខាន់សម្រាប់អនាគតបើមិនចង់ លើកដៃសូមជំនួយគេ ពេលជួបបញ្ហា ” ។
