តារាសម្ដែងលោក លី ណូរ៉ា ទទួលបានពាក្យបណ្ដឹង ពីបទឆបោកលុយប្រមាណ ៣ ម៉ឺនដុល្លារ ពីស្ត្រីម្នាក់
សិល្ប៖ នៅថ្មីៗនេះ អ្នកនិយមលេងនៅលើបណ្ដាញសង្គម Facebook មានការភ្ញាក់ផ្អើលយ៉ាងខ្លាំង ក្រោយបានឃើញតារាសម្តែង លោក លី ណូរ៉ា ចេញមកបង្ហោះវីដេអូដោយបញ្ជាក់ថា នៅពេលនេះលោកកំពុងតែរងនូវភាពអយុត្តិធម៌ ព្រោះមានស្ត្រីម្នាក់បានប្ដឹងលោកពីបទឆបោកលុយប្រមាណ ៣ ម៉ឺនដុល្លារ។
លោក លី ណូរ៉ា បានលើកឡើង និងនិយាយរៀបរាប់តាមរយៈវីដេអូនោះថា « លោកត្រូវបានរងភាពអយុត្តិធម៌ និងត្រូវបានគេប្ដឹង ទាំងដែលលោកមិនបានដឹងអ្វីទេហើយថែមទាំងមិនដែលស្គាល់អ្នកប្ដឹងនោះទៀត លោកក៏បន្ថែមថា លោកមិនដែលឆបោក ឬ ក្លែងបន្លំឯកសារក្លែងក្លាយអ្វីទេ» និងបានសុំឲ្យថ្នាក់ដឹកនាំច្បាប់ជួយដឹងឮ និងជួយរកយុត្តិធម៌ឲ្យ លោក ផង ។
ទន្ទឹមគ្នានេះដែរ លោក លី ណូរ៉ា ក៏បានប្រាប់ពីឈ្មោះ និងទីតាំងរបស់នៅរបស់ស្រ្តីម្នាក់ដែលបានដាក់ពាក្យបណ្ដឹង លោក ដោយស្រី្តម្នាក់នោះមានឈ្មោះថា លឹម ចន្ធី ជាអាណិកជនខ្មែរនៅអូស្ត្រាលី ដែលបច្ចុប្បន្នរស់នៅ សង្កាត់ ភ្នំពេញថ្មី ខណ្ឌ សែនសុខ រាជធានី ភ្នំពេញ ចំពោះមូលហេតុដែល ស្រី្តខាងបានដាក់ពាក្យបណ្ដឹង លោក លី ណូរ៉ា ព្រោះតែមានជនអនាមិក បានបង្កើត Account Facbook ក្លែងក្លាយនិងដាក់រូបរបស់ លោក លី ណូរ៉ា ហើយបានឆាតទៅខ្ចីលុយស្រ្តីខាងប្រមាណ ៣ ម៉ឺនដុល្លារ ក្រោយពេលខ្ចីហើយមិនឃើញសង និងទាក់ទងជនអនាមិក លែងបានទើបស្រ្តីខាងលើទ្រាំលែងបាន ក៏សម្រេចចិត្តដាក់ពាក្យបណ្ដឹង ដើម្បីឲ្យ លោក លី ណូរ៉ា ចេញមកដោះស្រាយរឿងបំណុលនេះ ហើយលោក លី ណូរ៉ា ក៏បានអះអាងថាលោកក៏ជាជនរងគ្រោះដូចគ្នា ជាមួយស្ត្រីអាណិកជននេះដែរ ។
ហើយរឿងដែលធ្វើឲ្យ លោក លី ណូរ៉ា ហួសចិត្តខ្លាំងនោះគឺ ការដាក់ពាក្យបណ្ដឹងមកកាន់លោកនេះគឺជាលើកទី ៣ ហើយ ខណៈលើកទី ១ និងលើកទី ២ ពាក្យបណ្ដឹងនេះមិនបានមកដល់ដៃរបស់លោកទេព្រោះមិនបានដឹងនូវរឿងទាំងនេះទេ ដោយពេលកន្លងមក លោក ក៏ធ្លាប់បង្ហោះសារជារឿយៗថា លោកត្រូវបានជនអនាមិកបង្កើត Facbook ក្លែងក្លាយដោយដាក់រូបលោកជាច្រើន Account ហើយលោកក៏សង្ឃឹមថា ខាងតុលាការ និងស្ថាប័នពាក់ព័ន្ធ នឹងផ្ដល់យុត្តិធម៌សម្រាប់រូបលោកចំពោះករណីនេះផងដែរ៕
