ករុណា ពេជ្រ នឹងវិលចូលសិល្បៈវិញជាមួយបទចាស់ ប៉ុន្តែរសជាតិថ្មី !

នៅថ្មីៗនេះតារាចម្រៀងលោក ករុណា ពេជ្រ បានបង្ហោះសារបង្ហើយពីតម្រុយនៃការវិលចូលសិល្បៈវិញ បន្ទាប់ពីលោកបានឃ្លាតឆ្ងាយពីវិស័យនេះ មួយរយៈពេលធំកន្លងមក ដើម្បីមកបំពេញបំណងនិងបំពេអារម្មណ៍ទស្សនិកជនជាថ្មីម្ដងទៀត ជាមួយបទចម្រៀងចាស់ ប៉ុន្តែអត្ថន័យក្នុងការនិពន្ធបានកែច្នៃទាំងបទភ្លេងថ្មី ទាំងបទចាស់និងនិពន្ធថ្មីផងដែរ ។

ចំពោះគោលបំណងនៃការវិលចូលសិល្បៈវិញលោក ករុណា ពេជ្រ បានឱ្យដឹងថាលោកនៅតែស្រលាញ់អាជីពមួយនេះ និងចង់រំលឹកអនុស្សាវរីយ៍កាលពី១៤ឆ្នាំមុន ខណៈបទចម្រៀងនីមួយៗរបស់លោកធ្លាប់ទទួលបានការគាំទ្រខ្លាំងពីមហាជន ជាពិសេសគឺបទកម្សត់ៗ ដែលបានធ្វើឱ្យពួកគេយំនិងចូលតួតាមបទ MV របស់លោកថែមទៀត ប៉ុន្តែមកវិញលើកនេះ ករុណា ពេជ្រ បានបញ្ជាក់ថានឹងមានរសជាតិថ្មីទាំងកម្សត់ទាំងសប្បាយ ដោយនឹងមិនធ្វើឱ្យអ្នកគាំទ្រខកបំណងនោះទេ ។

តារាចម្រៀងប្រុសរូបនេះក៏បានបន្តថាលោក នឹងចាប់ផ្ដើមមានវត្តមាននៅក្នុងផលិតកម្មថោនចាប់ពីថ្ងៃ ០៣ ខែតុលាឆ្នាំ២០២៤ ខាងមុខនេះហើយ រីឯមហាជនដែលធ្លាប់ជាអ្នកគាំទ្ររបស់លោក ករុណា ពេជ្រ ពួកគេពិតជារំភើប និងសប្បាយចិត្តជាខ្លាំងចំពោះដំណឹងនៃការវិលសិល្បៈវិញរបស់លោកផងដែរ ៕