ណុប បាយ៉ារិទ្ធ រំភើបចិត្តខ្លាំងជាមួយនឹងទង្វើរបស់សិល្បករជំនាន់ក្រោយពីររូប ដែលជ្រកក្នុងផលិតកម្មជាមួយគ្នា

ពិតណាស់បងប្អូនប្រាកដជាបានស្គាល់ហើយពីតារាចម្រៀងចាស់វស្សាលោក ណុប បាយ៉ារិទ្ធ ដែលជាតារាចម្រៀងមួយរូបមានប្រជាប្រិយភាពខ្លាំង តាមរយៈសំឡេងដ៏ពីរោះ និងសម្រស់ក៏ស្រស់់សង្ហាររបស់លោក ព្រមទាំងបទពិសោធន៍ជាច្រើនឆ្នាំលើវិស័យសិល្បៈចម្រៀង ទើបធ្វើឱ្យលោកមានឱកាសបានក្លាយជាគណកម្មការនៅក្នុងកម្មវិធីប្រឡងប្រជែងចម្រៀងលំដាប់ថ្នាក់ពិភពលោកជាច្រើន របស់ទូរទស្សន៍ហង្សមាស ដែលបានទិញសិទ្ធកម្មវិធីមកធ្វើនៅកម្ពុជា ។

ខណៈកាលពីពេលថ្មីៗកន្លងទៅនេះ លោក ណុប បាយ៉ារិទ្ធ បានបង្ហោះរូបភាពនៃសកម្មភាពស្និទ្ធស្នាលគ្នាខ្លាំងជាមួយសិល្បករជំនាន់ក្រោយពីររូប ព្រមទាំងបង្ហាញពីរអារម្មណ៍ពេញចិត្តខ្លាំងចំពោះទង្វើរបស់ពួកគេដែលតែងតែធ្វើដាក់លោកកន្លងមក ក្នុងនោះមានម្ចាស់ពាន Cambodian Idol រដូវកាលទី៤ លីម តិចម៉េច និង នាង ដាវិន ជាTop 4 ក្នុងកម្មវិធីប្រឡងចម្រៀង Cambodian Idol រដូវកាលទី៤ ផងដែរ ។

បើយោងតាមសំណេរទាំងស្រុងរបស់លោក ណុប បាយ៉ារិទ្ធ ដែលបានលើកឡើងនិយាយពាក់ព័ន្ធជាមួយលោក នាង ដាវិន ថា « ជាប្អូនម្នាក់ដែលតែងតែផ្តល់ក្តីស្រលាញ់ ការគោរព និង ការផ្លាស់ប្ដូរយោបល់ដ៏ល្អ ។ ជាសិល្បករជំនាន់ក្រោយម្នាក់ដែលមានសមត្ថភាពល្អជាចម្រុះ ក្លាហានជាមួយមហិច្ឆតារបស់ខ្លួនឯង ។ ងាកមក លីម តិចម៉េច វិញព្រោះតែទង្វើល្អៗ និងក្ដីស្រលាញ់ដែលលោកចេះគោរពលោកគ្រូ និងរៀមច្បងក្នុងសិល្បៈ ទើបទាក់ចិត្តឱ្យលោក ណុប បាយ៉ារិទ្ធ ស្រលាញ់ចូលចិត្តលោក រហូតដល់ថ្នាក់ឱប លីម តិចម៉េច នៅលើឆាកអំឡុងពេលប្រគុំតន្ត្រីថែមទៀត ៕