ផ្ទុះការចាប់អារម្មណ៍ក្រោយ សុគន្ធ និសា សម្រេចចិត្តធ្វើជាតារាចម្រៀងឯករាជ្យ

តារាចម្រៀងសំឡេងផ្អែមអ្នកនាង សុគន្ធ និសា បើគិតមកដល់ពេលនេះនាងបានប្រឡូកចូលវិស័យសិល្បៈរយៈពេលប្រមាណ ២១ឆ្នាំមកហើយ ដែលទទួលបានប្រជាប្រិយភាពនិងការគាំទ្រពីមហាជនជាច្រើនមកដល់នាបច្ចុប្បន្ននេះ តាមរយៈសំឡេងដ៏ពីរោះផ្អែមស្រទន់របស់នាង ហើយតារាចម្រៀងស្រីរូបនេះក៏ធ្លាប់បានបង្ហាញវត្តនៅក្នុងផលិតកម្មធំៗក្នុងស្រុកជាច្រើនផងដែរ ។

ខណៈនៅថ្មីៗនេះ សុគន្ធ និសា បានធ្វើឱ្យមហាជនអ្នកគាំទ្ររបស់នាងផ្ទុះការចាប់អារម្មណ៍ជាខ្លាំង ក្រោយ សុគន្ធ និសា បានទម្លាយឱ្យដឹងថានាងអាចនឹងចាកចេញពីផលិតកម្មហង្សមាសដែលធ្លាប់បានជ្រកក្នុងទ្រនំមួយនេះ និងបានកសាងកេរ្តិ៍ឈ្មោះល្បីល្បាយជាច្រើនឆ្នាំ មកធ្វើជាតារាចម្រៀងឯករាជ្យវិញ ដោយបានរៀបរាប់ថា «Here my offcial Page Sokun nisa Cambodia Independent Singer» ដោយមានន័យថា «នេះជាផេកផ្លូវការរបស់ សុគន្ធ និសា តារាចម្រៀងឯករាជ្យកម្ពុជា »។

តាមរយៈដំណឹងមួយនេះដែរ កំពុងតែធ្វើឱ្យអ្នកគាំទ្ររបស់តារាចម្រៀងស្រីរូបនេះមានកើតជាចម្ងល់ថា ហេតុអ្វីបានជានាងសម្រេចចិត្តធ្វើជាតារាចម្រៀងឯករាជ្យ តើនាងបានចាកចេញពីផលិតកម្មហង្សមាសហើយឬយ៉ាងណា និងមានមតិផ្សេងៗជាច្រើនទៀតផងដែរ ៕