ស្នាដៃថ្មីរបស់លោក ហ៊ុយ យ៉ាឡេង រឿងកុំស្លា.ប់ កំពុងត្រៀមចាក់បញ្ចាំងនៅពេលឆាប់ៗនេះ

លោក ហ៊ុយ យ៉ាឡេង គឺជាផលិតករល្បីឈ្មោះមួយរូបដែលធ្លាប់បានផលិតខ្សែភាពយន្តរឿងខ្មែរជាច្រើន ហើយសាច់រឿងនីមួយៗរបស់លោក គឺពិតជាទទួលបានការគាំទ្រយ៉ាងខ្លាំងពីសំណាក់ប្រជាជនកម្ពុជា ចំពោះភាពប៉ិនប្រសព្វ ទេពកោសល្យក្នុងការផលិត និងដឹកនាំសម្ដែងរបស់លោក លើពីនោះលោក ហ៊ុយ យ៉ាឡេង ក៏បានបង្ហាញវត្តមានសម្ដែងដោយផ្ទាល់នៅក្នុងសាច់រឿងមួយចំនួនដែលលោកបានផលិតផងដែរ ចំណុចមួយនេះហើយដែលធ្វើឱ្យអ្នកគាំទ្រមានការចាប់អារម្មណ៍ និងសរសើរមិនដាច់ពីមាត់ ចំពោះផលិតកររូបនេះដែលមានសមត្ថភាពពិត នឹងមិនដែលធ្វើឱ្យអ្នកគាំទ្រខកបំណងនោះទេ ។

ខណៈនៅថ្មីៗនេះលោក ហ៊ុយ យ៉ាឡេង បានបង្ហើបឱ្យដឹងពីការត្រៀមចាក់បញ្ចាំងខ្សែភាពយន្តរឿង កុំស្លាប់ ដែលជាស្នាដៃនិពន្ធថ្មីរបស់លោក ដែលបានចំណាយពេលជាច្រើនខែគួរសមដែរ ក្នុងការផលិតខ្សែរភាពយន្តរឿង កុំស្លាប់ នេះ ពោលគឺលោកបានធ្វើពិធីក្រុងពាលីថតរឿងកាលពីអំឡុងខែមិថុនា ឆ្នាំ២០២៤ កន្លងទៅ ដោយមកដល់ពេលរឿង កុំស្លាប់ បានថតចប់ហើយនិងកំពុងតែត្រៀមចាក់បញ្ចាំងនៅរោងភាពយន្តថ្ងៃទី ០៥ ខែធ្នូ ឆ្នាំ២០២៤ ខាងមុខនេះ ។

ទន្ទឹមនិងការបង្ហើបឱ្យដឹងពីដំណឹងត្រៀមចាក់បញ្ចាំងរឿង កុំស្លាប់ នេះដែរលោក ហ៊ុយ យ៉ាឡេង បានបង្ហោះសំណេរមួយដោយមានអត្ថន័យថា« ជីវិតជារបស់អ្នក តែការសម្រេចចិត្តកុំស្លាប់ ឬសម្លាប់ខ្លួន វាអាស្រ័យកម្ម បីសាចវាតែងអន្ទងតាមយកជីវិតអ្នកទន់ខ្សោយ ហាមដាច់ខាតកុំស្លាប់ »៕