ចប់សប្តាហ៍ទី១ ក្រុមវិសាខា ឈរនៅលើកំពូលតារាងនៃបាល់ទះ តេជោលីគ…?
ការប្រកួតបាល់ទះលីគកំពូលកម្ពុជា ហៅកាត់ថា «តេជោលីគ» រដូវកាលដំបូងបានចប់សប្តាហ៍ទី១ហើយ ដោយក្រុមខ្លាំងវិសាខា បានឈរលើកំពូលតារាងពិន្ទុ បន្ទាប់ពីធ្វើបានយ៉ាងល្អជាងគេក្នុងចំណោមការប្រកួតទាំងពីរលើក។
ពិតណាស់ នៅថ្ងៃទី១ ក្រុមវិសាខា បានយកឈ្នះក្រុមនគរបាលខេត្តកណ្តាល ដោយលទ្ធផល ៣-០ (ពិន្ទុ ២៥-១៤, ២៥-១៨ និង២៥-១២) ហើយការប្រកួតថ្ងៃទី២ ក្រុមខ្លាំងវិសាខា បានយកឈ្នះក្រុមនគរបាលខេត្តពោធិ៍សាត់ ដោយលទ្ធផល ៣-០ (ពិន្ទុ ២៥-១៦, ២៥-២៣ និង ២៥-១២) បើតាមរយៈលទ្ធផលទាំងពីរលើកដែលមានគ្រាប់បាល់ចំណេញច្រើនជាងគេ បានរុញឲ្យវិសាខា បានឈរលើកំពូលតារាង។
យ៉ាងណាមិញ ក្រុមដែលមិនទាន់ស្គាល់បរាជ័យដូចវិសាខា នោះគឺ បញ្ជាការដ្ឋានអង្គរ និងក្រសួងមហាផ្ទៃ ដែលឈ្នះពីរប្រកួតដូចគ្នា ហើយក្រុមនគរបាលខេត្តព្រះសីហនុ ជាក្រុមមកពីខេត្តដែលធ្វើបានល្អជាងគេ បន្ទាប់ពីឆ្លងកាត់ ២ប្រកួតឈ្នះ១ ប្រកួត និងចាញ់១ ប្រកួត ដោយកំពុងឈរលេខ ៤ក្នុងតារាងពិន្ទុ។
ដោយឡែកទៅមើល ក្រុមធ្វើមិនសូវបានល្អ ដោយត្រូវបានដៃគូរកបានពិន្ទុច្រើនគ្រាប់ និងរកបានពិន្ទុពីដៃគូបានតិច គឺក្រុមនគរបាលខេត្តកណ្តាល ស្ថិតនៅចំណាត់ថ្នាក់លេខ៨ (បាតតារាង) និងក្រុមនគរបាលខេត្តពោធិ៍សាត់ ស្ថិតនៅចំណាត់ថ្នាក់លេខ៧។
គួរបញ្ជាក់ផងដែរថា បន្ទាប់ពីចប់ការប្រកួតវិលជុំសន្សំពិន្ទុ ក្រុមលេខ៧ និងលេខ៨ ត្រូវកាត់ចោល ខណៈ ៦ក្រុមខាងលើនឹងបន្តទៅប្រកួតវិលជុំសន្សំពិន្ទុលើកទី២។
*លទ្ធផលថ្ងៃទី១ ទី១៣ ខែមករា ឆ្នាំ២០២៤
-បញ្ជាការដ្ឋានអង្គរក្ស ៣-0 នគរបាលព្រះសីហនុ
-ក្រសួងមហាផ្ទៃ ៣-១ នគរបាលពោធិ៍សាត់
-វិសាខា ៣-០ នគរបាលខេត្តកណ្តាល
-កងពលធំអន្តរាគមន៍លេខ៣ ២-៣ នគរបាលរាជធានីភ្នំពេញ
*លទ្ធផលថ្ងៃទី២ ទី១៤ ខែមករា ឆ្នាំ២ឥ២៤
– បញ្ជាការដ្ឋានអង្គរក្ស ៣-១ កងពលធំអន្តរាគមន៍លេខ៣
– ក្រសួងមហាផ្ទៃ ៣-១ នគរបាលរាជធានីភ្នំពេញ
– នគរបាលខេត្តកណ្តាល ០-៣ នគរបាលព្រះសីហនុ
– វិសាខា ៣-០ នគរបាលពោធិ៍សាត់៕
