ទីបំផុត ទេព បូព្រឹក្ស សម្រេចបំណងដែលបានថត MV នៅលើដែនយសោធរ
សិល្ប៖ នៅដើមឆ្នាំ ២០២៤ នេះតារាចម្រៀងអ្នកនាង ទេព បូព្រឹក្ស បានសម្រេចបំណងថត MV នៅលើដែនយសោធរ ដែលរូបនាងតែងតែប្រាថ្នាចង់ថតមកជាយូរមកហើយ ពោលកាលពីអំឡុងចុងខែកញ្ញាឆ្នាំ ២០២៣ កន្លងទៅ ទេព បូព្រឹក្ស បានលើកឡើងថា បើសិនជាផ្ដល់ឱកាសឲ្យនាងថត MV បទ ទេវរាជ និង មហានគរ នៅប្រាសាទអង្គរវត្តនោះ នឹងមិនធ្វើឲ្យអ្នកគាំទ្រ និងប្រជាជនខ្មែរទាំងអស់ខកបំណងនោះទេ តាមរយៈការលើកឡើងរបស់ ទេព បូព្រឹក្ស នេះដែរ ក៏ទទួលបានការចាប់អារម្មណ៍យ៉ាងខ្លាំងពីអ្នកសិល្បៈ និងមហាជនអ្នកគាំទ្រថែមទាំងស្នើទៅកាន់ក្រសួងពាក់ព័ន្ធ ដើម្បជួយសម្រួលក្នុងការថត MV ផងដែរ ។
ជាក់ស្ដែងនៅថ្ងៃទី ១៥ ខែ មករា ឆ្នាំ ២០២៤ ម្សិលមិញនេះ មហាជនអ្នកគាំទ្របានសម្ដែងនូវក្ដីរំភើប និងអបអរសាទរដល់ ទេព បូព្រឹក្ស ដែលបានសម្រេចបំណងប្រាថ្នាថត MV បទ ទេវរាជ របស់នាង នៅលើដែនយសោធរ ក្នុងនោះ ទេព បូព្រឹក្ស ក៏បានបង្ហោះវីដេអូ និងភ្ជាប់មកជាមួយសំណេរដែលបង្ហាញពីអារម្មណ៍ដែលខ្លួនថា « ជាបំណងប្រាថ្នាជាការរង់ចាំថ្ងៃនេះក៏បានមកដល់ ផ្ទាំងទស្សនីយភាពនៃបទ ទេវរាជ ដោយលើកនេះពួកយើងបានមកឈរជើងនៅទីតាំងនៃ បុព្វបុរស ដ៏មហារុងរឿង ដើម្បីបង្ហាញនូវផ្ទាំងទស្សនីយភាពដ៏អស្ចារ្យមួយសម្រាប់បងប្អូន »។
បន្ថែមពីនោះ ទេព បូព្រឹក្ស ក៏បានបញ្ជាក់ផងដែរថា ចំពោះការរៀបចំថត MV បទ ទេវរាជ នៅលើដែនយសោធរនេះគឺចាប់ផ្ដើមថតពីថ្ងៃទី ១៦ រហូត ដល់ថ្ងៃទី ១៩ ខែមករា ឆ្នាំ ២០២៤ ទន្ទឹមគ្នាអ្នកគាំទ្រក៏កំពុងរង់ចាំទស្សនា MV បទ ទេវរាជ របស់ ទេព បូព្រឹក្ស នេះយ៉ាងអន្ទះសារផងដែរ ។
