ពាក់មី ហួសចិត្តក្រោយឃើញសភាពផ្ទះដែលជាងធ្វើលំៗ ខណៈផ្ទះនេះទិញសម្រាប់ឲ្យកូនរស់នៅមិនមែនទិញសម្រាប់លក់វិញទេ !
កាលពីថ្ងៃទី១៨ ខែមីនា ឆ្នាំ២០២៤ ម្សិលមិញនេះតារាកំប្លែងនាយ ពាក់មី បានចែករំលែកជាមួយការហួសចិត្តជាខ្លាំង ក្រោយលោកបានចុះទៅមើល និងឃើញផ្ទាល់ពីសភាពផ្ទះដែលបានទិញពីបុរីមួយកន្លែង ដោយបានជួបរឿងដែលស្មានមិនដល់ជាច្រើន នៅបរិវេណទាំងខាងក្នុងនិងខាងក្រៅផ្ទះដែលបានទិញនោះ ។
បើយោងតាមរយៈការចែករំលែករូបភាពផ្ទះរបស់តារាកំប្លែងរូបនេះ និងបានអមមកជាមួយខ្លឹមសារដោយរៀបរាប់ទាំងហួសចិត្តថា«ផ្ទះទិញឲ្យអាតួ(កូនប្រុស ) កុងត្រា១៨ខែ ទិញដាច់បង់លុយដាច់ តែជាង៣ឆ្នាំហើយ នៅធ្វើមិនទាន់ហើយទៀត សូមម្ចាស់បុរី ជួយធ្វើឲ្យផង ជាពិសេសសូមដាក់ជាងដែលមានជំនាញមកធ្វើផង ដីខ្ពស់ជាងផ្ទះ សរសរចាក់មិនត្រង់ជួរគ្នា ការ៉ូក្រាលខ្ពស់ទាប និង នៅមានជាច្រើនទៀត ។
នាយពាក់មីក៏បានបន្តឲ្យដឹងថា ពីមុនមកលោកក៏ធ្លាប់ជាជាងធ្វើសំណង់ដែរ គឺលោកយល់ច្បាស់ពីសំណង់ ប៉ុន្តែពេលដាក់ជាងគ្មានជំនាញ ធ្វើផ្ទះលោកបែបនេះ ហាក់ដូចមើលងាយលោកណាស់ ហើយតារាកំប្លែងរូបនេះក៏បានសង្កត់ធ្ងន់ៗថា ប្រាប់ហើយថា ផ្ទះខ្ញុំទិញទុកឲ្យកូននៅ មិនមែនទិញទុកលក់វិញទេ សូមយកចិត្តទុកដាក់លើជាងផង ៕
