មោទកភាព! ព្រះនាងតូច ជេនណា ច្រៀងចម្រៀងខ្មែរ និងរាំរបាំអប្សរារបស់ខ្មែរ ក្នុងកម្មវិធីលំដាប់អន្តរជាតិមួយក្នុងប្រទេសចិន
កាលពីថ្ងៃទី ១០ ខែធ្នូ ឆ្នាំ ២០២៣ កន្លងទៅ ជាមោទកភាពមួយដែលព្រះនាងនរោត្តម ជេនណា បានបង្ហាញវត្តមានច្រៀងចម្រៀងខ្មែរ ក្នុងកម្មវិធី «A World of Great Harmony» ដែលបង្ហាញតាមរយៈស្ថានីយ៏ទូរទស្សន៍ដ៏ធំមួយក្នុងប្រទេសចិន ។
តាមរយៈការបង្ហាញវត្តមាននៅឆាករបស់ស្ថានីយ៏ទូរស្សន៍អន្តរជាតិនេះដែរ ព្រះនាង នរោត្តម ជេនណា បាននាំយកនូវបទចម្រៀងខ្មែរ និងគ្រងនូវឈុតសម្លៀកបំពាក់ប្រពៃណីខ្មែរ ក៏ដូចជារបាំអប្សរាបង្ហាញនៅលើឆាកផ្សព្វផ្សាយឲ្យពិភពលោកបានស្គាល់កម្ពុជាកាន់តែច្រើន ។
ក្រោយបានបង្ហាញព្រះភ័ក្រ្តក្នុងកម្មវិធី «A World of Great Harmony» របស់ស្ថានីយ៏ទូរស្សន៍ CCTV ប្រទេសចិនរួច ព្រះនាង នរោត្តម ជេនណា ក៏បានបង្ហោះសារនៅលើផេក Facebook ផ្លូវការថា « ខ្ញុំមានមោទកភាពណាស់ ដែលបានបង្ហាញវត្ថមានក្នុងឆាកទូរទស្សន៍ CCTV មួយដ៏ធំនៅសាធារណរដ្ឋប្រជាមានិតចិនក្នុងសម្លៀកបំពាក់ប្រពៃណីខ្មែរ និងបកស្រាយចម្រៀងខ្មែរបទ មាគ៌ាអង្គរដោយមានការរាំរបាំដ៏ពិសេសអស្ចារ្យពីសាលារបាំនរោត្តមបុប្ផាទេវី ក្រោមព្រះកិច្ចដឹកនាំរបស់ព្រះអង្គម្ចាស់ ស៊ីសុវត្ថិ តេសូ ។ទន្ទឹមនឹងនេះ ខ្ញុំក៏បានបកស្រាយចម្រៀងជាភាសាចិនជាមួយកុមារាកុមារីជនជាតិចិនដ៏ឆ្លាតវៃ និងស្អាតផងដែរ » ។
