លុយច្រើនប៉ុណ្ណាក៏គង់តែស្លាប់! ម្ចាស់សណ្ឋាគារនិងកាស៊ីណូ ណាហ្កាវើលដ៏ បានទទួលមរណភាពហើយក្នុងវ័យ ៧៥ឆ្នាំ
មហាសេដ្ឋីលំដាប់ទី៧របស់ម៉ាឡេស៊ី លោក Chen Lip Keong និងជាជាស្ថាបនិកក្រុមហ៊ុនNagaCorp ដែលមានសាខានៅក្នុងប្រទេសកម្ពុជាដែរនោះ បានទទួលមរណភាពដោយសារជំងឺក្នុងវ័យ ៧៥ឆ្នាំ នៅថ្ងៃទី១០ ខែធ្នូ ឆ្នាំ២០២៣ម្សិលមិញនេះ។
យោងតាមប្រភពព័ត៌មានម៉ាឡេស៊ីបានឲ្យដឹងថា លោក Chen Lip Keong ជាមហាសេដ្ឋីលំដាប់ទី៧ នៅម៉ាឡេស៊ី និងជាស្ថាបនិកក្រុមហ៊ុន NagaCorp ហើយមរណភាពរបស់មហាសេដ្ឋីរូបនេះបានបន្សល់ទុកនូវសម្បត្តិប្រមាណ ២,៨ពាន់លានដុល្លារអាមេរិក។
ក្រុមហ៊ុន NagaCorp បានចេញសេចក្តីថ្លែងការណ៍មួយ ដោយបន្តសរសើរពីស្នាដៃ និងការដឹកនាំរបស់ជាមហាសេដ្ឋីទី៧ ម៉ាឡេស៊ី ក្នុងអំឡុងពេលដឹកនាំក្រុមហ៊ុនផងដែរ និងបានប្រកាសតែងតាំង លោក Chen Yiy Fon ដែលជាកូនប្រុសមួយរូបរបស់លោក Chen Lip Keong និងជានាយកប្រតិបត្តិនៃក្រុមហ៊ុនកន្លងមក ឱ្យក្លាយជាប្រធានប្រតិបត្តិ (CEO) ថ្មី ចាប់ពីថ្ងៃទី១០ ខែធ្នូ ដោយកូនប្រុសរូបនេះ ត្រូវកាន់តំណែង និងមានការខុសត្រូវ ដូចឪពុករបស់ខ្លួនធ្លាប់កាន់ពីមុនមក។
តាមការចុះផ្សាយរបស់ទស្សនាវដ្តីអាមេរិក Forb គិតត្រឹមខែឧសភា ឆ្នាំ២០២៣ លោក Chen Lip Keong ជាមហាសេដ្ឋីមានជាងគេលំដាប់ទី ៧ នៅម៉ាឡេស៊ី ដោយមានទ្រព្យសម្បត្តិប្រមាណ ២,៣ពាន់លានដុល្លារ។ នៅក្នុងវេបសាយរបស់ខ្លួន ក្រុមហ៊ុន NagaCorp ទទួលបានអាជ្ញាប័ណ្ណបើកកាស៊ីណូរហូតដល់ឆ្នាំ២០៦៥ នៅកម្ពុជា និងមានសិទ្ធិផ្តាច់មុខ ក្នុងការដំណើរការ កាស៊ីណូ ក្នុងចម្ងាយ ២០០គីឡូម៉ែត្រ នៅក្នុងក្រុងភ្នំពេញ រហូតដល់ ២០៤៥ ។
គួររំឮកថា លោកChen Lip Keong ជាអ្នកវិនិយោគដែលបានជួយកម្ពុជាជាច្រើននាពេលកន្លងមក ជាក់ស្ដែងនៅក្នុងវិបត្តិកូវីដ១៩ លោកបានបរិច្ចាគថវិកាជាច្រើនលានដុល្លារដើម្បីឱ្យរដ្ឋាភិបាលកម្ពុជាទប់ស្កាត់ការរីករាលដាលជំងឺកូវីដ១៩ក្នុងសហគមន៍ក៏ដូចជាជួយសង្គ្រោះដែលមានវិបត្តិនៅក្នុងអំឡុងពេលនោះផងដែរ ៕
