ម្ចាស់មេដាយមាស កីឡាអាស៊ី ឆ្នាំ២០១៨ ខាន់ ចេសា ដាក់គោលដៅយកមេដាយមាស២គ្រឿងឱ្យកម្ពុជា
កីឡាការិនីជូជឺតស៊ូ ខាន់ ចេសា បានដាក់គោលដៅយកមេដាយមាសជូនកម្ពុជាឱ្យបាន ២គ្រឿង ក្នុងការប្រកួតកីឡាស៊ីហ្គេមឆ្នាំ២០២៣ខាងមុខនេះ។
កីឡាការិនីរូបនេះបានមកដល់ទឹកដីកម្ពុជា នៅព្រឹកថ្ងៃច័ន្ទកាលពីម្សិលមិញនេះ ជាមួយទំនុកចិត្ដខ្ពស់ ក្នុងការស្វែងរកមេដាយមាសជូនជាតិ។ ម្ចាស់មេដាយមាស កីឡាអាស៊ី ឆ្នាំ២០១៨ រូបនេះបាននិយាយថា ខ្ញុំពិតជាសប្បាយចិត្ត ក្នុងការមកចូលរួមប្រកួតប្រជែងតំណាងឱ្យកម្ពុជា ព្រមទាំងមានការគាំទ្រយ៉ាងខ្លាំងពីសំណាក់ប្រជាជន និងអ្នកទាំងអស់គ្នា។ ខ្ញុំមានជំនឿចិត្តខ្ពស់ក្នុងការទទួលបានមេដាយជូនកម្ពុជា។ ខ្ញុំសង្ឃឹមថា នឹងយកបានមេដាយមាស២គ្រឿងជូនកម្ពុជា ក្នុងព្រឹត្តិការណ៍ដ៏សំខាន់មួយនេះ។
ជាមួយគ្នានេះ ខាន់ ចេសា បានអះអាងថានាងមិនមានបញ្ហារបួស និងសុខភាពអ្វីនោះទេក្នុងការត្រៀមប្រកួតស៊ីហ្គេមនេះ។ ផ្ទុយទៅវិញ មានតែកម្លាំងចិត្តកើនឡើងទ្វេដងនៅពេលបានឃើញអ្នកគាំទ្រចាំទទួលយ៉ាងច្រើនបែបនេះ៕