ភាពរុងរឿងនៃវិស័យកីឡាកម្ពុជា ២០២៣
រាជធានីភ្នំពេញ ៖ វិស័យកីឡានៅកម្ពុជាបានឈានដល់របត់ថ្មីបំផុតនៅក្នុងកំណត់ត្រាស៊ីហ្គេម និងកំណត់ត្រាកីឡារបស់ប្រទេសនៅពេលដែលខ្លួនធ្វើជាម្ចាស់ផ្ទះព្រឹត្តិការណ៍ស៊ីហ្គេម លើកទី២៣ ដោយមក ដល់ពេលនេះអត្តពលិករកម្ពុជានៅតែឈរនៅលើលំដាប់កំពូលនៃតារាងមេដាយដែលគ្មាននរណាអាចគិតថា កម្ពុជាអាចធ្វើបានទេពីមុនមក ។
ចាប់តាំងពីកម្ពុជាទទួលបានឯករាជ្យពីបារាំង នៅថ្ងៃទី០៩ ខែវិច្ឆិកា ឆ្នាំ១០៥៣ មកដល់ពេលនេះ សូម្បីតែពេលដែលកម្ពុជាធ្វើជាម្ចាស់ផ្ទះកីឡាហ្គាណេហ្វូ (Ganefo) ពីថ្ងៃទី២៥ ខែវិច្ឆិកា ដល់ថ្ងៃទី០៦ ខែធ្នូ ឆ្នាំ១៩៦៦ ហើយបានឆ្លងកាត់សម័យសង្គ្រាមស៊ីវិលពីឆ្នាំ១៩៧០ ដល់១៩៩៨មក ដល់ឆ្នាំ២០២២ កម្ពុជាមិនដែលឆ្លងកាត់ប្រវត្តិរុងរឿងខាងកីឡាដូច ឆ្នាំ២០២៣ នេះឡើយ ។ ចាប់តាំងពិធីបើកព្រឹត្តិការណ៍កីឡាស៊ីហ្គេមលើកទី៣២ យ៉ាងជោគជ័យ និងទទួលបានការគាំទ្រ និងស្ញើចសរសើរពីគ្រប់មជ្ឈដ្ឋានទាំងជាតិ និងអន្តរជាតិអត្តពលិកកម្ពុជាដែលបានចូលរួមជាង១០០០ នាក់ នៅពេលនេះបានបំបែកកំណត់ត្រាហួសពីការរំពឹងទុក ។
កាលពីឆ្នាំ២០២២ នៅពេលដែលវៀតណាមធ្វើជាម្ចាស់ផ្ទះកម្ពុជាបានអះអាងថា ពីភាពជោគជ័យរបស់ខ្លួនដោយនៅក្នុងអំឡុងព្រឹត្តិការណ៍នោះអត្តពលិកកម្ពុជាអាចដណ្តើមបានមេដាយសរុប៦៣ ដោយនៅពេលនោះ មេដាយមាសបាន៩ មេដាយប្រាក់បាន១៣ និង មេដាយសំរឹទ្ធបាន៤១ ។ ប៉ុន្តែមួយឆ្នាំកន្លងមក ក្រោមការយកចិត្តទុកដាក់ និងគាំពាររបស់រាជរដ្ឋាភិបាល អត្តពលិកកម្ពុជាបានបង្កការភ្ញាក់ផ្អើលដោយត្រឡប់ពីខ្លួនពីបាតតារាងមេដាយមកលើលំដាប់កំពូលជាបន្តបន្ទាប់អស់រយៈពេល៤ថ្ងៃជាប់ៗគ្នា ។
គិតត្រឹមព្រឹកថ្ងៃទី០៨ ខែ ឧសភា ឆ្នាំ២០២៣ វេលាម៉ោង១១គត់ អត្តពលិកកម្ពុជាបានដណ្តើម មេដាយទាំងអស់ចំនួន៧៤ នៅក្នុងចំណោមមេដាយសរុប៤១៨ មេដាយ ដោយនៅក្នុងនោះមេដាយមាសមានរហូតដល់៣២ ប្រាក់២១ និងសំរឹទ្ធ២១ ។ អត្តពលិកកម្ពុជាបាននៅបន្តនាំមុខអត្តពលិកថៃ ដែលបានដណ្តើមមេដាយសរុប៥៧ ដោយមានមេដាយមាស១៦ ប្រាក់១៧ និងសំរឹទ្ធ២៤ ហើយឥណ្ឌូនេស៊ីបានមេដាយសរុប៥២ ដោយមេដាយមាសបាន១៦ប្រាក់១២ និងសំរឹទ្ធ ២៤ ។ ហ្វីលីពិននៅលំដាប់ទី៤ ដោយមានមេដាយសរុប៥៧ នៅក្នុងនោះមាសមាន១៥ មេដាយប្រាក់២០ និងសំរឹទ្ធ២២ ។
នៅក្នុងការប្រកួតដែលចាប់ផ្តើម តាំងពីថ្ងៃទី២៩ ខែមេសា មកដល់ ពេលនេះអត្តពលិកកម្ពុជាបានធ្វើយ៉ាងល្អលើវិញ្ញាសារជាច្រើននៅក្នុងប្រភេទកីឡាខ្លះដែលកម្ពុជាមិនដែលបានធ្វើល្អឡើយ ដូចជាប្រភេទកីឡា បាល់បោះ គ្រីឃីត … ហើយ កាលពីរាត្រីថ្ងៃទី០៧ ខែឧសភា កន្លងទៅនេះ អត្តពលិកនៃកីឡាបាល់ទះនៅក្នុងសាលកម្ពុជាក៏បានធ្វើយ៉ាងល្អដោយបានបោះជំហ៊ានដល់វគ្គផ្តាច់ព្រ័ត្ត ដើម្បីដណ្តើមមេដាយមាស ក្រោយបំបាក់អត្តពលិកថៃ នៅក្នុងការប្រកួត៥ដង ដោយថៃនាំមុខពីរប្រកួត ហើយកម្ពុជាបានបំបាក់ថៃនៅ៣ ប្រកួតចុងក្រោយ នៅក្នុងលទ្ធផលដ៏ត្រចះត្រចង់ ។
ភាពនៃអត្តពលិកកម្ពុជាមិនអន់ឡើយ ក្រោយពេលដែលរាជរដ្ឋាភិបាលកម្ពុជា បានសន្សែសន្សំថវិកា ដើម្បីដាក់ទុនវិនិយោគនៅលើវិស័យកីឡាដែលមានថវិកាសរុបប្រមាណជា១១៨លានដុល្លារ ដើម្បីចំណាយនៅលើការរៀបចំផ្សេងៗដោយរួមទាំងការថែបំប៉នកម្លាំង បញ្ហាភស្តុភាពកម្ម ការធ្វើជាម្ចាស់ផ្ទះបើកកម្មវិធីកីឡាស៊ីហ្គេម និងប៉ារ៉ាហ្គេម ហើយកម្លាំងចិត្តដ៏សំខាន់ថែមទៀតនោះ គឺប្រាក់រង្វាន់ដែលរាជរដ្ឋាភិបាលបានប្រកាសថា អ្នកដែលបានមេដាយមាសអាចទទួលបានប្រាក់រង្វាន់រហូតដល់៤០លានរៀលឬ១ម៉ឺនដុល្លារ សម្រាប់មេដាយមាស, ៣០លានរៀល ឫជាង៧ពាន់ដុល្លារ សម្រាប់មេដាយប្រាក់ និង ១៦លានរៀល ឬជាង៣ពាន់ដុល្លារសម្រាប់មេដាយសំរឹទ្ធ ។
ទំហំទឹកប្រាក់នេះ គឺច្រើនគួរសមដែរ ប៉ុន្តែទោះបីជាយ៉ាងណាក៏ដោយក៏ជាមួយនឹងការចំណាយនេះ យើងបានទទួលលទ្ធផលនោះគាប់ប្រសើរដែរ ដោយពេលនេះយើងបានរៀបចំព្រឹត្តិការណ៍បើកដ៏ជោគជ័យ ។ ម្យ៉ាងវិញទៀតកីឡា គឺជាទូតសុឆន្ទៈមួយដែលនឹងជួយ ដល់ការបង្កើនការផ្សព្វផ្សាយពីកម្ពុជានាំឲ្យបង្កើនការយល់ការស្គាល់ពីកម្ពុជា ។ ព្រឹត្តិការណ៍ ដែលកម្ពុជាដាក់ទុននេះនឹងក្លាយជាយន្តការសត្យានុម័តមួយដែលនឹងបង្កើនផលប្រយោជន៍ដល់វិស័យសេដ្ឋកិច្ច ពាណិជ្ជកម្ម ជាពិសេស គឺទាក់ទាញទេសចរណ៍ និងវិនិយោគទុនជាពិសេស គឺធ្វើឲ្យកេរ្តិ៍ឈ្មោះកម្ពុជាលេចយ៉ាងត្រដែតនៅលើឆាកអន្តរជាតិបន្ថែមលើជោគជ័យខាងនយោបាយ និងការទូតដែលកម្ពុជាបានធ្វើជោគជ័យជាបន្ត បន្ទាប់ដូចជា ការធ្វើជាម្ចាស់ផ្ទះនៃកិច្ចប្រជុំកំពូលអាស៊ាន៣ ដងកិច្ចប្រជុំកំពូលអាស៊ី-អឺរ៉ុបម្តង និងព្រឹត្តិការណ៍អន្តរជាតិនានាកន្លងមក ។
សរុបមកវិញទោះបីជាលទ្ធផលទម្រាំដល់ថ្ងៃបញ្ចប់ពោល គឺថ្ងៃទី១៧ ខែ ឧសភា ឆ្នាំ២០២៣ ប្រែប្រួលយ៉ាងណាក៏យើងខ្ញុំសង្ឃឹមថា មជ្ឈដ្ឋានទូទៅនានានឹងបន្តពូនជ្រុំការគាំទ្រដល់ការអភិវឌ្ឈន៍វិស័យកីឡានៅកម្ពុជាបន្តទៀត ។ យើងខ្ញុំក៏សង្ឃឹមថា រាជរដ្ឋាភិបាលនឹងបន្តស្វះ ស្វែងរកមូលនិធិពីប្រភពផ្សេងៗ ដើម្បីបន្តទំនុកបម្រុងអត្តពលិករបស់យើងបន្តទៀត ដើម្បីឲ្យវិស័យកីឡានៅកម្ពុជាបន្តរួមចំណែកគាំទ្រដល់ដំណើរការអភិវឌ្ឈកម្ពុជានៅថ្ងៃអនាគត។
លទ្ឋផលនៃការប្រកួតកីឡានេះមិនមែនបានមកដោយចៃដន្យឡើយ ។ វាជាការខិតខំរួមទាំងអស់គ្នាទាំងរដ្ឋាភិបាល គ្រូបង្ហាត់ កីឡាករ និង ចូលរួមគាមទ្ររបស់ប្រជាជន កម្ពុជាផងដែរ។ សូមអោយវិស័យកីឡានេះ កាន់តែរីកចម្រើនទៅនៅពេលខាងមុខទៀត ៕
ប្រភព៖ កោះសន្តិភាព