Pique បដិសេធការអញ្ជើញឱ្យចូលរួមការអបអរការឈ្នះពាន La Liga របស់ Barcelona
កីឡាករ Gerard Pique ត្រូវបានគេរាយការណ៍ថាបានច្រានចោលការអញ្ជើញរបស់ក្លិប Barcelona ដើម្បីទៅអបអរការឈ្នះពានរង្វាន់ La Liga នៅតាមដងផ្លូវក្នុងទីក្រុងកាលពីថ្ងៃចន្ទ ទី១៥ ឧសភា។ ក្រុមអ្នកមានបុណ្យ បានឈ្នះជើងឯកលីគដំបូងរបស់ពួកគេក្រោមការដឹកនាំរបស់អ្នកចាត់ការលោក Xavi Hernandez ជាមួយនឹងជ័យជម្នះ ៤-២ លើគូប្រជែងក្នុងស្រុកក្រុម Espanyol កាលពីថ្ងៃអាទិត្យ ទី១៤ ឧសភា។ដោយពួកគេបានអបអរជ័យជម្នះជាមួយនឹងអ្នកគាំទ្រ តាមរយៈក្បួនដង្ហែររថយន្តក្រុងនៅថ្ងៃបន្ទាប់។
យោងតាមគេហទំព័រ Mirror បានឲ្យដឹងថា Pique ត្រូវបានអញ្ជើញឱ្យចូលរួមជាមួយអតីតមិត្តរួមក្រុម ប៉ុន្តែរូបគេបានបដិសេធសំណើរមួយនេះរបស់ក្លិប។ យ៉ាងណា ប្រធានក្លិបលោក Joan Laporta និងគ្រូបង្វឹកលោក Xavi Hernandez បានចេញសាលក្រមលើតួនាទីរបស់ខ្សែការពាររូបនេះក្នុងក្រុមដែលជួយឲ្យ Barcelona ឈ្នះពានលីគកំពូលអេស៉្បាញនៅរដូវកាលនេះ ទោះបីជារូបគេបង្ហាញខ្លួនបានតែ ៦ប្រកួតក៏ដោយនៅតែលោក Laporta ចាត់ទុក Pique ជាអ្នករួមចំណែកក្នុងការទទួលបានជោគជ័យមួយនេះ។
គួរបញ្ជាក់ថា កីឡាករសញ្ជាតិអេស្ប៉ាញបានប្រកាសពីការសម្រេចចិត្តចូលនិវត្តន៍ពីបាល់ទាត់កាលពីខែវិច្ឆិកា ដោយបានលុបចោលកិច្ចសន្យាលេងបន្តនៅទឹកដី Camp Nou៕