អីយ៉ាស់! លោក Xavi និយាយបែបនេះ ក្រោយដឹងថា Man United លក់ក្លិបបានជោគជ័យ

អ្នកចាត់ការទូទៅក្លិប Barcelona លោក Xavi Hernández បានលើកឡើងអំពីក្លិប Manchester United ដែលត្រូវបានព្រះអង្គម្ចាស់ Sheikh Jassim របស់ប្រទេសកាតាដេញថ្លៃ បានដោយជោគជ័យនៅដំណាក់កាលទីមួយកាលពីពេលថ្មីៗនេះ។

យោងតាមសារព័ត៌មាន Reuters បានឲ្យដឹងថាក្លិបបិសាចក្រហម និងព្រះអង្គ Sheikh Jassim កំពុងចរចារឿងទិញក្លិបជាលើកចុងក្រោយ នេះមានន័យថាក្លិបមិនអាចចរចាជាមួយអ្នកដេញថ្លៃផ្សេងបាននោះទេ ក្នុងរយៈពេលដែលបានកំណត់ នេះអាចជាជំហានដ៏ធំមួយក្នុងការទិញយកក្លិបបាល់ទាត់នៅអង់គ្លេសពីគ្រួសារ Glazer ក្នុងតម្លៃជាង ៦ ពាន់លានដុល្លារ។

ចំពេលរបាយការណ៍ទាំងនេះបានលេចចេញ ដែលធ្វើឲ្យលោក Xavi សរសើរព្រះអង្គ Sheikh Jassim ដោយនិយាយថា ពិតជាល្អសម្រាប់ Manchester United ដែលមានខ្សែរាជវង្សរបស់កាតាជាម្ចាស់ក្លិបដោយលោកបញ្ចេញមតិថា៖ “ខ្ញុំមានទំនាក់ទំនងល្អជាមួយអ្នកដែលចាប់អារម្មណ៍ក្នុងការទិញក្លិប Man United គាត់ជាមនុស្សម្នាក់ដែលម៉ឺងម៉ាត់ ហើយខ្ញុំប្រាកដថាគាត់នឹងធ្វើការងារមួយនេះបានល្អ ខ្ញុំស្គាល់គាត់ច្បាស់ណាស់ គាត់ជាមនុស្សល្អ មានទំនួលខុសត្រូវខ្ពស់”។

គួរបញ្ជាក់ថា លោក Xavi Hernández ស្គាល់ព្រះអង្គម្ចាស់ Sheikh Jassim អស់រយៈពេលប្រហែលប្រាំមួយឆ្នាំមកហើយ ដែលលោកធ្លាប់បានដឹកនាំក្លិប Al Sadd កាលពីឆ្នាំ ២០១៥ ដល់ ២០១៩ ហើយបានចាកចេញក្នុងឆ្នាំ ២០២១ ដើម្បីធ្វើជាគ្រូបង្វឹកក្រុម Barcelona វិញម្ដង។ ប្រភព៖ sportskeeda