ផ្លូវការ៖ Busquets ចូលរួមជាមួយ Inter Miami
កីឡាករ Sergio Busquets បានចុះហត្ថលេខាជាផ្លូវការជាមួយក្លិប Inter Miami ខ្សែបម្រើវ័យ ៣៤ ឆ្នាំបានចូលរួមជាមួយក្លិបក្នុងនាមជាកីឡាករឥតគិតថ្លៃ ដែលចុះកុងត្រារហូតដល់ឆ្នាំ ២០២៥ នៅលើទឹកដីសហរដ្ឋអាមេរិច។
ការទៅលេងនៅលីគកំពូល MLS ដែលជាកម្មសិទ្ធិរបស់អតីតកីឡាករ David Beckham បានធ្វើឲ្យអ្នកគាំទ្រមានការភ្ញាក់ផ្អើលជាខ្លាំង បន្ទាប់ពីក្លិបបានប្រកាសពីការផ្លាស់ប្ដូរមួយនេះ ដោយភ្ជាប់មកជាមួយសាច់រឿងនៃអាជីពបាល់ទាត់របស់ Busquets យ៉ាងណា រូបគេនឹងត្រូវលេងជាមួយតារាឆ្នើម Leo Messi ចាប់ពីចុងខែ កក្កដា នេះតទៅដែលអ្នកទាំងពីរក៏ធ្លាប់ជាអតីតមិត្តរួមក្រុមជាមួយគ្នាកាលពីនៅក្លិប Barcelona ក្រោយខ្សែប្រយុទ្ធសញ្ជាតិអាហ្សង់ទីន បានចាកចេញក្នុងឆ្នាំ២០២១។
គួរបញ្ជាក់ថា ខ្សែបម្រើជើងចាស់ Sergio Busquets បានបង្ហាញខ្លួនជាង ៧២២ ប្រកួតឲ្យក្រុមនៅអេស៉្បាញ និងស៊ុតបញ្ចូលទីបាន ១៨ គ្រាប់ និងបញ្ជូនបាល់ឲ្យមិត្តរួមក្រុមច្រើនជាង ៤០ ដងក្នុងនាមជាខ្សែបម្រើការពារ៕ ប្រភព៖ Inter Miami