រដ្ឋាភិបាលគ្រោងបញ្ចេញរថយន្តក្រុងជិត ៤០០ គ្រឿង សម្រាប់ដឹកជញ្ជូនប្រជាពលរដ្ឋទៅបោះឆ្នោត
រាជធានីភ្នំពេញ៖ រាជរដ្ឋាភិបាលកម្ពុជាគ្រោងនឹងបញ្ចេញរថយន្តក្រុងប្រមាណ ៣០០ ទៅ ៣៥០ គ្រឿង ដើម្បីដឹកពលរដ្ឋពីភ្នំពេញ ទៅបោះឆ្នោតតាមបណ្តាខេត្ត និងដឹកត្រលប់មកភ្នំពេញវិញ។ នេះបើយោងតាមសារសម្លេងរបស់សម្ដេចតេជោហ៊ុន សែន នៅរសៀលថ្ងៃទី១១ ខែកក្កដា ២០២៣ នេះ។
សម្ដេចតេជោមានប្រសាសន៍ថា រាជរដ្ឋាភិបាលបានអនុញ្ញាតឲ្យកម្មករ កម្មការិនី បានឈប់សម្រាកចំនួន ៣ថ្ងៃ ដើម្បីទៅចូលរួមបោះឆ្នោត និងដើម្បីសម្រួលដល់ការធ្វើដំណើរ រាជរដ្ឋាភិបាលក៏បានសម្រេចឲ្យរដ្ឋបាលសាលារាជធានីភ្នំពេញ បញ្ចេញរថយន្តក្រុងប្រមាណពី ៣០០ ទៅ ៣៥០គ្រឿង ដើម្បីត្រៀមដឹកកម្មករ កម្មការិនី ប្រជាពលរដ្ឋដែលត្រូវទៅបោះឆ្នោតតាមបណ្ដាខេត្ត នឹងដឹកត្រលប់មកវិញ។
សម្ដេចតេជោបន្តថា ការផ្ដល់មធ្យោបាយដឹកជញ្ជូននេះ ធ្វើឡើងដោយគ្មានការរើសអើងគណបក្សនយោបាយណាមួយនោះទេ ហើយក៏មិនមែនជាការទិញដូរសន្លឹកឆ្នោតនោះដែរ ព្រោះមិនដឹងថា តើអ្នកណានឹងត្រូវបោះឆ្នោតឲ្យអ្នកណានោះឡើយ ដូច្នេះវាមិនមែនជាការសូកប៉ាន់សម្រាប់ដោះដូរជាមួយនិងសន្លឹកឆ្នោតនោះទេ។
គួរបញ្ជាក់ផងដែរ យោងតាមប្រសាសន៍ខាងលើសម្ដេចបានស្នើឲ្យក្រសួងការងារនិងបណ្ដុះបណ្ដាលវិជ្ជាជីវៈ និងរដ្ឋបាលរាជធានីភ្នំពេញ ត្រូវសហការគ្នា ដើម្បីបែងចែកផ្លូវ និងបែងចែករថយន្តក្រុងតម្រូវទៅតាមបណ្តាខេត្ត ដែលមានចំនួនពលរដ្ឋ ជាពិសេសកម្មករ កម្មការិនី ទៅច្រើន និងតិច ហើយការដឹកជញ្ជូនកម្មករនេះ នឹងត្រូវធ្វើឡើងនៅថ្ងៃទី២២ ខែកក្កដា នឹងដឹកត្រលប់មកវិញនៅថ្ងៃទី២៤ ខែកក្កដា ឆ្នាំ២០២៣ ចំពោះអ្នកបើកបររថយន្តក្រុងទាំងអស់ក៏ត្រូវសម្រួលពេលវេលា ដើម្បីឱ្យពួកគេបានបោះឆ្នោតផងដែរ៕