Inter Miami ចង់បានតារាចម្រៀងលំដាប់ពិភពលោក សម្រាប់ការបង្ហាញ Messi នៅកីឡដ្ឋានរបស់ខ្លួន
របាយការណ៍មួយបានបង្ហាញថា មានតារាចម្រៀងពីររូបដែលមានឈ្មោះបោះសំឡេងគឺ Shakira និង Bad Bunny កំពុងត្រូវបានរៀបចំសម្រាប់ឲ្យចូលរួមក្នុង ការដាក់បង្ហាញជាផ្លូវការ នៅខ្សែប្រយុទ្ធ Lionel Messi ក្នុងនាមជាកីឡាកររបស់ក្លិប Inter Miami ដែលព្រឹត្តិការណ៍នេះនឹងប្រព្រឹត្តទៅនៅថ្ងៃអាទិត្យ ទី ១៦ ខែកក្កដា នៅឯកីឡដ្ឋាន DRV Pink ក្នុងទីក្រុង Fort Lauderdale រដ្ឋ Florida ។
ក្នុងអំឡុងពេលនៃការបង្ហាញនេះ នឹងមានកម្មវិធីកម្សាន្ត សុន្ទរកថាលើទីលាន និងកម្មវិធីជាច្រើនទៀត ដែលទំនងជាត្រូវបានចាក់ផ្សាយក្នុងអំឡុងពេលពាក់កណ្តាលតង់នៃការប្រកួតពានរង្វាន់ Gold Cup វគ្គផ្តាច់ព្រ័ត្រ។
លើសពីនេះទៅទៀត កីឡាករសញ្ជាតិអាហ្សង់ទីន អាចនឹងត្រូវចូលរួមក្នុងបទបង្ហាញជាមួយអតីតកីឡាកររបស់ Barcelona គឺ Sergio Busquets ដោយ Busquets និង Messi ធ្លាប់ជាមិត្តរួមក្រុមជាមួយគ្នាចំនួន ១៣ រដូវកាលតាំងពីឆ្នាំ ២០០៨ ដល់ឆ្នាំ ២០២១ ពិសេសទៀតនោះ ពួកគេក៏នឹងជួបជាមួយអតីតមិត្តរួមក្រុមម្នាក់ទៀតគឺកីឡាករ Jordi Alba ផងដែរ៕ ប្រភព៖ tribuna
