ក្របខណ្ឌបាល់ទាត់ Premier League កាន់តែក្តៅគគុក ក្នុងសប្តាហ៍ទី ៣៣នេះ
ក្របខណ្ធ English Premier League គឺជាលីគដែលពិបាក និងមានការប្រកួតប្រជែងខ្លាំងជាងលីគណាណាទាំងអស់។ ក្នុងរដូវកាល 2022-23 នេះ មានការប្រែប្រួលជាខ្លាំង ដោយក្រុម កាលពីរដូវកាលមុនធ្លាប់តែខ្លាំងឥលូវធ្លាក់ទៅដល់ចំណាត់ថ្នាក់លេខ ៦ លេខ ៧ តួយ៉ាងដូចជាក្រុម Tottenham Hotspur និង ក្រុម Liverpool ជាដើម ចំណែកឯក្រុម Newcastles united ដែលចាប់ផ្តើមរដូវកាលលេងមិនសូវល្អ និងស្ថិតនៅបាតតារាងក៏បានឡើងមកឈរចំណាត់លេខ៣ នៅពីលើក្រុមបិសាចក្រហមទៅទៀត។
បើក្រឡេកទៅកំពូលតារាងវិញ ក្រុមខ្លាំងទាំងពីរកំពុងប្រជែងគ្នាយ៉ាងស្វិតស្វាញ ដោយក្រុមកាំភ្លើងធំ Arsenal ដែលជាក្រុមខ្លាំងតាំងពីដើមរដូវកាលមកត្រូវបានភ្លាត់ស្នៀតនៅ ៣ ប្រកួតចុងក្រោយ ដោយស្មើ ២ និង ចាញ់ ១ ប្រកួត និងមានពិន្ទុ ៧៥ បន្តឈរកំពូលតារាងនាំមុខក្រុមចំណាត់ថ្នាក់លេខ២ (Manchester City) ២ពិន្ទុប៉ុណ្ណោះកាលពីយប់មិញនេះ ខណៈក្រុមកាំភ្លើងធំ Arsenal បានចាញ់ក្រុមប្រកួតប្រជែង មេឃខៀរ Man City ដោយលទ្ធផលមិននឹកស្មាន ៤ ទល់១ ។
គួរបញ្ជាក់ផងដែរថា ទោះបីក្រុម កាំភ្លើងធំ Arsenal ប្រកួត ៣៣ ប្រកួតមានពិន្ទុ ៧៥ លើសក្រុមមេឃខៀវ Man City ដែលមានពិន្ទុ ៧៣ ប៉ុន្តែក្រុម Man City សល់២ ប្រកួតក្នុងដៃ ដោយក្រុមរបស់គេទើបតែប្រកួតបាន ៣១ ប្រកួតតែប៉ុណ្ណោះ ដូច្នេះបើក្រុម Man City យកឈ្នះក្នុងការប្រកួតណាមួយដែលមានក្នុងដៃក្រុមរបស់គេនឹងលោតឡើងមកកំពូលតារាងវិញម្តង ។
សម្រាប់យប់នេះរំលងអាធ្រាត្រ លីគ English Premier League ក៏មាន បីប្រកួតផងដែរ Everton ទទួលក្រុមភ្ញៀវដែលកំពុងឡើងជើង Newcastle United វេលាម៉ោង ១ និង ៤៥នាទី Southampton ទទួលក្រុមភ្ញៀវ AFC Bournemouth វេលាម៉ោង ១ និង ៤៥ នាទី ដូចគ្នានិងគូចុងក្រោយ មាន់ខ្នាយមាស Tottenham hotspur ទទួលក្រុមភ្ញៀវបិសាចក្រហម Manchester United វេលាម៉ោង ២ និង ១៥នាទី រំលងអាធ្រាត្រ៕