ពិតជាមិនធម្មតាមែន! ក្រុមបាល់ទះអ៊ីរ៉ង់ បានឈ្នះម្ចាស់ផ្ទះចិន យកមេដាយមាស នៅក្នុងកីឡាអាស៊ី ៣លើកជាប់ៗគ្នា…
ក្រុមបាល់ទះជម្រើសជាតិ អ៊ីរ៉ង់ បានឈ្នះមេដាយមាស ក្នុងកីឡាអាស៊ី លើកទី១៩ ឆ្នាំ២០២៣ បន្ទាប់ពីយកឈ្នះម្ចាស់ផ្ទះចិន ដោយលទ្ធផល ១-៣ នៅវគ្គផ្តាច់ព្រ័ត្រ កាលពីយប់ថ្ងៃទី២៦ ខែកញ្ញា ឆ្នាំ២០២៣ កន្លងទៅ។
ពិតណាស់ ពេលបើកឆាកសិតទី១ ក្រុមបាល់ទះចិន ដែលមានអ្នកគាំទ្រយ៉ាងច្រើននៅទីលាន Linping Sport Center Gymnsium ដោយបានយកឈ្នះក្រុមបាល់ទះអ៊ីរ៉ង់ ដោយពិន្ទុ ២៥-១៩ ប៉ុន្តែអ៊ីរ៉ង់ បានវាយបកយកឈ្នះ ៣ សិតជាប់គ្នាវិញ (ពិន្ទុ ១៤-២៥, ២២-២៥ និង២៤-២៦) ហើយទទួលបានមេដាយមាស តែម្តង។
យ៉ាងណាមិញ នេះជាការឈ្នះមេដាយមាស ក្នុងព្រឹត្តិការណ៍កីឡាអាស៊ី ៣លើកជាប់ៗគ្នា របស់ក្រុមបាល់ទះជម្រើសជាតិ អ៊ីរ៉ង់ បន្ទាប់ពីពួកគេបានឈ្នះមេដាយមាស កាលពីឆ្នាំ២០១៨ នៅប្រទេសឥណ្ឌូណេស៊ី និងឆ្នាំ២០១៤ នៅប្រទេសកូរ៉េខាងត្បូង។
គួរបញ្ជាក់ផងដែរថា ក្រុមបាល់ទះជម្រើសជាតិ ចិន ក្នុងនាមជាម្ចាស់ផ្ទះទទួលបានមេដាយប្រាក់ ខណៈជប៉ុន ទទួលបានសំរិទ្ធ ក្នុងចំណោមក្រុមបាល់ទះជម្រើសជាតិចំនួន ១៩ ដែលបានចូលរួមប្រកួតវិញ្ញាសាបាល់ទះបុរសក្នុងសាលនេះ កម្ពុជាស្ថិតនៅចំណាត់ថ្នាក់លេខ១៩ បន្ទាប់ពីចាញ់ទាំងពីរប្រកួតនៅវគ្គសន្សំពិន្ទុក្នុងពូល៕
