អេមណាស់! កៅ បុរី បានម៉ូតូថ្មី១ គ្រឿង ក្រោយជួយឲ្យក្រុមស្នងការត្បូងឃ្មុំ លើកពានភូមិភាគកំពង់ចាម…!
ក្រោយជួយឲ្យក្រុមកីឡាបាល់ទះស្នងការដ្ឋាននគរបាលខេត្តត្បូងឃ្មុំ ឈ្នះជើងឯកពានភូមិភាគកំពង់ចាម WURKZ Special Volleyball Cup 4×4 ឆ្នាំ២០២៤ កាលពីពេលថ្មីៗនេះ កៅ បុរី ដែលជាអ្នកប៉ះសេឆ្នើមនិងជាប្រធានក្រុម ត្រូវបានលោកឧត្ដមសេនីយ៍ទោ ម៉ុន មាគ៌ា ស្នងការនិងជាប្រធានកីឡាបាល់ទះនៃស្នងការដ្ឋាននគរបាលខេត្តត្បូងឃ្មុំ ឧបត្ថម្ភម៉ូតូហុងដាឌ្រីម១ គ្រឿងជាការលើកទឹកចិត្ត។
ពិតណាស់ ជាមួយនឹងរង្វាន់លើកទឹកចិត្តដ៏ធំមួយនេះ កៅ បុរី បានបង្ហាញអារម្មណ៍សប្បាយរីករាយជាខ្លាំង និងបានប្ដេជ្ញាចិត្តខំប្រឹងប្រែងបន្ថែមទៀតនៅការប្រកួតធំនៅរាជធានីភ្នំពេញ ហើយបើតាមការបញ្ជាក់ពីអតីតអ្នកប៉ះសេក្លឹបបញ្ជាការរដ្ឋានអង្គរក្ស ការផ្ដល់ជូនម៉ូតូហុងដាឌ្រីមឆ្នាំ២០២៤ ដ៏ថ្មីសន្លាងមួយនេះ គឺដោយសារតាំងពីបង្កើតក្រុមកកីឡាបាល់ទះស្នងការខេត្តត្បូងឃ្មុំមក រូបគេពុំដែលបានទទួលប្រាក់ឧបត្ថម្ភបន្ថែមពីលើឡើយ ចំណែកកីឡាករក្មេងៗពួកគេទទួលបានជាហូហែរ។
កៅ បុរី បានពន្យល់ថា៖ “តាំងពីកកើតក្រុមកីឡាមក គាត់អត់ដែលបានអីឲ្យខ្ញុំ ដោយសារក្មេងៗមានប្រាក់ឧបត្ថម្ភពីលើ ហើយខ្ញុំអត់បានទេ ជួយហ្វឹកហាត់និងដឹកនាំក្រុមរហូតតាំងពី២០២២ មក ហើយគាត់ថាលុយកាក់គាត់មិនដែលឧបត្ថម្ភ អ៊ីចឹងគាត់ឧបត្ថម្ភសរុបឲ្យខ្ញុំចឹងទៅ”។
គួរបញ្ជាក់ផងដែរថា ក្លឹបបាល់ទះស្នងការដ្ឋាននគរបាលខេត្តត្បូងឃ្មុំ កាលពីថ្ងៃទី១០ ខែមីនា ឆ្នាំ២០២៤ កន្លងទៅ បានយកឈ្នះលើស្នងការដ្ឋាននគរបាលខេត្តកំពង់ចាម ក្នុងលទ្ធផល ២សិតទល់១សិត នៅវគ្គផ្ដាច់ព្រ័ត្រលើកពានភូមិភាគប្រចាំខេត្តកំពង់ចាម Wurkz Special Volleyball Cup 4×4 ឆ្នាំ២០២៤៕
