គ្រូជម្រើសជាតិបាល់ទះបុរសអ៊ីរ៉ង់ សុំលាឈប់ក្រោយឈ្នះមេដាយមាស Asian Games បាន ៩ថ្ងៃ
លោក Behrouz Ataei គ្រូបង្វឹកក្រុមបាល់ទះបុរសរបស់អ៊ីរ៉ង់ បានសម្រេចចែកផ្លូវជាមួយក្រុមជម្រើសជាតិអ៊ីរ៉ង់ ក្រោយឈ្នះមេដាយមាសកីឡាអាស៊ី Asian Games បានចំនួន ៩ថ្ងៃ បន្ទាប់ពីលោកបានដឹកនាំក្រុមចាញ់ ប៉ុន្មានប្រកួតចុងក្រោយនៅវគ្គជម្រុះឆ្ពោះទៅកាន់កីឡាអូឡាំពិករដូវក្ដៅ 2024 Summer Olympics នៅទីក្រុងប៉ារីស ប្រទេសបារាំង។
ពិតណាស់ ក្រុមបាល់ទះជម្រើសជាតិអ៊ីរ៉ង់ បានរកជ័យជម្នះគ្រប់ការប្រកួតក្នុងព្រឹត្តិការណ៍កីឡាអាស៊ី Asian Games ថ្មីៗនេះ តាំងពីវគ្គជម្រុះតាមពូល រហូតដល់វគ្គផ្ដាច់ព្រ័ត្រ ហើយឈ្នះមេដាយ ៣សម័យកាលជាប់ៗគ្នាគឺឆ្នាំ២០១៤ នៅកូរ៉េខាងត្បូង ឆ្នាំ២០១៨ នៅឥណ្ឌូណេស៊ី និងឆ្នាំ២០២៣ នេះតែម្តង។ ប៉ុន្តែអ្វីដែលដើមចម ដែលធ្វើឲ្យបុរសវ័យ ៥៣ឆ្នាំរូបនេះ ដើរចេញពីក្រុមជម្រើសជាតិអ៊ីរ៉ង់ ពីព្រោះតែខ្លួនដឹកនាំចាញ់រហូតដល់ទៅ ៣ប្រកួតក្នុងចំណោម ៤ប្រកួតចុងក្រោយនៅវគ្គជម្រុះកីឡាអូឡាំពិក 2023 Olympic Qualification Tournaments ដែលកំពុងធ្វើឡើងនៅប្រទេសប្រេស៊ីល។
យ៉ាងណាមិញ ក្រោយឈ្នះមេដាយមាស នៅប្រទេសចិន នៅថ្ងៃទី២៦ ខែកញ្ញា ឆ្នាំ២០២៣ ក្រុមអ៊ីរ៉ង់ បានធ្វើដំណើរទៅទីក្រុង Rio de Janeiro ប្រទេសប្រេស៊ីល ពោលគឺ ៤ថ្ងៃបន្ទាប់ បានចាញ់ អាល្លឺម៉ង់ ៣សិតទល់១ បន្តចាញ់អ៊ុយក្រែន ៣សិតទល់០ និងឈ្នះកាតារ ៣សិតទល់១ និងរាត្រីថ្ងៃទីពុធ ថ្មីៗនេះបានបន្តចាញ់ក្រុមសាធារណរដ្ឋឆេក ៣សិតទល់១ ហើយការចាកចេញពាក់កណ្ដាលទី នេះធ្វើឲ្យក្រុមជម្រើសជាតិអ៊ីរ៉ង់ តែលតោល ព្រោះនៅសល់ការប្រកួត ៣លើកទៀតក្នុងវគ្គជម្រុះពូល A នេះ ដោយបន្តប៉ះអ៊ីតាលី នៅថ្ងៃទី៦ ខែកញ្ញា ហើយបន្តប៉ះម្ចាស់ផ្ទះប្រេស៊ីល នៅថ្ងៃទី៧ ខែតុលា និងចុងក្រោយថ្ងៃទី៨ ខែតុលា ជួបក្រុមគុយបា។
គួរបញ្ជាក់ផងដែរថា លោក Behrouz Ataei ក៏ជាអតីតក្រុមជម្រើសជាតិអ៊ីរ៉ង់ នៅចន្លោះទសវត្សទី ៨០-៩០ ក្រោយមកលោកត្រូវបានជ្រើសរើសឲ្យធ្វើជាគ្រូជំនួយតាមបណ្ដាក្លិបនិងក្រុមជម្រើសជាតិ រហូតឡើងជាគ្រូឈុតធំនៅឆ្នាំ២០២១ ហើយនៅឆ្នាំ២០២៣ នេះក្រុមជម្រើសជាតិអ៊ីរ៉ង់ បាន ១០ប្រកួតក្នុងចំណោម ១២ប្រកួត នៃពានរង្វាន់ 2023 Nations League ហើយបន្តរបូតពានរង្វាន់ជើងឯកទ្វីបអាស៊ី 2023 Asian Championship ដោយថ្វីដៃរបស់ជប៉ុន នៅវគ្គផ្ដាច់ព្រ័ត្រ កាលពីខែកក្កដា ថ្មីៗនេះ និងបន្តឈ្នះមេដាយមាស Asian Games៕
