កក្រើកទៀតហើយ! ការប្រកួតបាល់ទះ «តេជោលីគ» គឺក្រុមកីឡាករឆ្នើម នឹងត្រូវប៉ះក្រុមជម្រើសជាតិ ក្នុងជំនួបមិត្តភាព នៅថ្ងៃបើក…
មហាព្រឹត្តិការណ៍ជាប្រវត្តិសាស្រ្តថ្មី ក្នុងវិស័យបាល់ទះកម្ពុជា គឺការប្រកួតបាល់ទះលីគកំពូលកម្ពុជា «តេជោលីគ» (Techo Volleyball Cambodia League) ដែលនឹងប្រព្រឹត្តិទៅ ចាប់ពីថ្ងៃទី១២ ខែមករា ដល់ ថ្ងៃទី១៨ ខែមីនា ឆ្នាំ២០២៤ ដោយការប្រកួតនឹងធ្វើឡើងនៅថ្ងៃ សុក្រ-សៅរ៍ និងថ្ងៃអាទិត្យ។
ពិតណាស់ នៅថ្ងៃបើកការប្រកួត ក៏មានគូពិសេស នឹងធ្វើការប្រកួតគ្នា ដើម្បីឲ្យប្រិយមិត្តបានទស្សនាកាន់តែមានភាពសប្បាយរីករាយ ដោយក្រុមកីឡាករឆ្នើម នៅក្នុងពានរង្វាន់កីឡាបាល់ទះសម្តេចក្រឡាហោម ស ខេង ឆ្នាំ២០២៣ ដែលដឹកនាំដោយគ្រូបង្វឹក លោក អ៊ូ សុផល នឹងត្រូវប្រកួតមិត្តភាពជាមួយក្រុមបាល់ទះជម្រើសជាតិកម្ពុជា ដោយការប្រកួតនោះ នឹងត្រូវធ្វើឡើងនៅថ្ងៃទី១២ ខែមករា ឆ្នាំ២០២៣ នៅក្នុងសាលនៃ ពហុកីឡដ្ឋានជាតិ រាជធានីភ្នំពេញ វេលាម៉ោង ៥:០០នាទីល្ងាចតទៅ។
គួរបញ្ជាក់ផងដែរថា ព្រឹត្តិការណ៍ប្រកួតបាល់ទះ «តេជោលីគ» (Techo Volleyball Cambodia League) នឹងមានក្រុមចូលរួមប្រកួតប្រជែងមានចំនួន ៨ ក្រុម ក្នុងនោះមានដូចជា៖ សមាគមបាល់ទះវិសាខា, សមាគមក្រសួងមហាផ្ទៃ, ក្លិបបញ្ជាការដ្ឋានអង្គរក្ស, កងពលធំអន្តរាគមន៍លេខ៣, ក្លិបរដ្ឋបាលរាជធានីភ្នំពេញ, ក្លិបបាល់ទះខេត្តព្រះសីហនុ, ក្លិបស្នងការដ្ឋាននគរបាលពោធិសាត់ និងក្លិបស្នងការដ្ឋាននគរបាលកណ្តាល។
ចំពោះរូបមន្តនៃការប្រកួតត្រូវបានចែកជា ៣ជុំ មានដូចជា៖
-ជុំទី១៖ ក្រុមទាំង ៨ ប៉ះគ្នាចំនួន ១ជើង
-ជុំទី២៖ ក្រុមលេខ១ ដល់ ៦ (ចំណាត់ថ្នាក់ជុំទី១) ប៉ះគ្នាជំនួន ១ជុំទៀត
-ជុំទី៣៖ ក្រុមលេខ១ ប៉ះ លេខ៣ ក្រុម លេខ២ ប៉ះ លេខ៤ (ចំណាត់ថ្នាក់ជុំទី២)៕
