តារាឆ្នើមរាបាល់ទះកម្ពុជា គួន មុំ បានប្រាប់អំពីកត្តាអំណោយផលរបស់ក្រុមបាល់ទះកម្ពុជា
កីឡាករបាល់ទះជម្រើសជាតិកម្ពុជា និងក្លិបបាល់ទះវិសាខា គួន មុំ បានសង្កេតឃើញកាយសម្បទារបស់ក្រុមកីឡាករបាល់ទះជម្រើសជាតិកម្ពុជាមានអំណោយផលល្អមិនចាញ់ប្រទេសជិតខាងប៉ុន្មានឡើយ ប៉ុន្តែបទពិសោធ និងស្មារតីនៅមានកម្រិត ហើយតាមរយៈបទពិសោធដែលធ្លាប់លេងនៅប្រទេសវៀតណាម និងឥណ្ឌូណេស៊ី គួន មុំ បានឲ្យដឹងថា៖ “សម្រាប់បទពិសោធដែលខ្ញុំធ្លាប់ទៅលេងនៅក្រៅប្រទេសដូចជា វៀតណាម ឥណ្ឌូណេស៊ី ឃើញគេមានក្រុមច្រើនចូលរួមប្រកួតប្រជែង ការរៀបចំរបស់គេច្បាស់លាស់មានលីគ មានពានច្រើន ធន់ធានកីឡាករគេ បើតាមខ្ញុំសង្កេតមើលអត់លើយើងប៉ុន្មានទេ”។
ពិតណាស់ តាឆ្នើម គួន មុំ បាននិយាយថា៖ “បើមើលក្រុមជម្រើសជាតិយើង ធៀបជាមួយក្រុមជម្រើសជាតិរបស់គេ កាយសម្បទារបស់កម្ពុជាយើងមានម៉ាចប់ ចង់ល្អជាងគេផង ប៉ុន្តែយើងខ្វះបទពិសោធនៃការលេង និងបច្ចេកទេសរបស់គ្រូបង្ហាត់ គ្រូបង្វឹកគេមានផ្លាស់ប្តូរពីក្លិបមួយទៅក្លិបមួយច្រើន ធ្វើឲ្យកីឡាករគេទទួលបានបទពិសោធថ្មីៗច្រើន សមត្ថភាពកាន់តែរីកចម្រើន»។
យ៉ាងណាមិញ ការលើកឡើងខាងលើនេះ បន្ទាប់ពីកម្ពុជារៀបចំឲ្យមានលីគបាល់ទះកំពូលកម្ពុជាជាលើកដំបូងដែលគ្រោងចាប់ផ្តើមនៅថ្ងៃទី១២ ខែមករា ឆ្នាំ២០២៤ខាងមុខ ហើយ គួន មុំ បានចាត់ទុក «តេជោលីគ» ជាសសរស្តម្ភក្នុងការពង្រឹង និងជំរុញវិស័យកីឡាបាល់ទះកម្ពុជាផងដែរ។
គាត់បានបន្ថែមទៀតថា៖ “ក្នុងនាមខ្ញុំជាកីឡាករម្នាក់ ខ្ញុំសប្បាយចិត្តខ្លាំងសម្រាប់សហព័ន្ធយើងអាចបង្កើតលីគបានជាលើកដំបូង នេះជាការអភិវឌ្ឍមួយជំហានទៀតដែលយើងមិនធ្លាប់មានពីមុនមក ខ្ញុំសង្ឃឹមថា លីគនេះនឹងជួយអភិវឌ្ឍវិស័យកីឡាបាល់ទះកម្ពុជា ហើយនឹងជំរុញឲ្យកម្ពុជាសំបូរធនធានកាន់តែច្រើន ក្រុមជម្រើសជាតិកាន់តែខ្លាំង”។
គួរបញ្ជាក់ផងដែរថា បើតាមការគ្រោងទុក ការប្រកួត «តេជោលីគ» នឹងចាប់ផ្តើមនៅថ្ងៃទី១២ ខែមករា ដល់ទីថ្ងៃ១៨ ខែកុម្ភៈ ឆ្នាំ២០២៤ នៅវិមានពហុកីឡដ្ឋានជាតិអូឡាំពិក ដោយមានក្រុមបាល់ទះអាជីពចំនួន៨ ចូលរួមប្រកួត រួមមានក្រុមបាល់ទះវិសាខា ក្រសួងមហាផ្ទៃ បញ្ជាការដ្ឋានអង្គរក្ស កងពលធំអន្តរាគមន៍លេខ៣ រដ្ឋបាលរាជធានីភ្នំពេញ ក្រុមនគរបាលព្រះសីហនុ ក្រុមនគរបាលពោធិ៍សាត់ និងក្រុមនគរបាលខេត្តកណ្តាល ហើយចម្រាប់ជុំទី១ ការប្រកួតជុំសន្សំពិន្ទុ បន្ទាប់មកក្រុម២ ទាបជាងគេត្រូវបានកាត់ចេញ ហើយក្រុមលេខ ១ដល់៦ ត្រូវបន្តប្រកួតវិលជុំសន្សំពិន្ទុជុំទី២ ក្រោយចប់ជុំទី២ ក្រុមមានពិន្ទុទាបជាងគេ២ ត្រូវបានកាត់ចេញ និងមាន ៤ក្រុម ឡើងទៅជុំទី៣ ដែលត្រូវវគ្គពាក់កណ្តាលផ្តាច់ព្រ័ត្រ និង២ក្រុមឡើងវគ្គផ្តាច់ព្រ័ត្រតែម្តង៕
