ប៊ុត សីហា ត្រឡប់មកវិញហើយព្រមទាំងទម្លាយថាបន្តិចទៀតលោកនឹងមានអ្វីថ្មីជូនអ្នកគាំទ្រ
សិល្ប៖ ក្រោយបាត់មុខពីបណ្ដាញសង្គមរយៈពេលប្រមាណ ៤ខែកន្លងមក ដែលត្រូវសមត្ថកិច្ចឃាត់ខ្លួនពាក់ព័ន្ធជាមួយករណីប្រើប្រាស់គ្រឿងញៀនតារាចម្រៀងនិងជាម្ចាស់ពាន«The Voice Cambodia»រដូលកាលទីមួយលោក ប៊ុត សីហា នៅពេលនេះបានលេចវត្តមានមកជាថ្មី និងត្រៀមចូលវិលចូលសិល្បៈវិញ ដើម្បីមានឱកាសបានសាងជីវិតនៅក្នុងសង្គមជាថ្មី ។
ជាមួយគ្នានោះក៏សង្កេតឃើញថាលោក ប៊ុត សីហា បានបង្ហោះសារនៅលើផេកផ្លូវការរបស់លោក ដោយឲ្យបងប្អូនអ្នកគាំទ្រចងចាំលោកផង បន្តិចទៀតលោកនឹងមានអ្វីថ្មី បទថ្មី ដែលលោកក៏មិនធ្លាប់ដែលច្រៀងបទប្រភេទបែបហ្នឹងដែរ គ្រាន់សាកបើកទំព័រថ្មីសាកល្បង ។ ទន្ទឹមគ្នានោះលោកក៏បង្ហោះសារផ្ដាំផ្ញើទៅលោកស្រី ទ្រី ដាណា ផងដែរ ខណៈលោកស្រីធ្លាប់បានជួយលោកនាពេលកន្លងមកដោយសារបានរៀបរាប់ថា «លោកជំទាវចិត្តធម៌ដែលធ្លាប់ជួយខ្ញុំកន្លងមកទ្រី ដាណា Dana Try មកពីខ្ញុំទេដែលដើរផ្លូវខុស លោកជំទាវលើសពីល្អពេកហើយសម្រាប់អ្នកក្រីក្រ» ។
គួររំឭកផងដែរថា លោក ប៊ុត សីហា ត្រូវបានចាប់ខ្លួនចំនួនពីរលើករួចមកហើយ ជុំវិញករណីគ្រឿងញៀនដែលទង្វើនេះក៏ត្រូវបានអ្នកគាំទ្រ និងអ្នកសិល្បៈជាច្រើនបង្ហាញការហួសចិត្តចំពោះលោក ដែលមិនចេះកែប្រែបើទោះបីជាមានការលើកទឹកចិត្តការអធ្យាស្រ័យនិងការជួយជ្រោមជ្រែងពីមជ្ឈដ្ឋាននានាក៏ដោយក្ដី។
យ៉ាងមិញក្រោយលោកត្រឡប់មកវិញលើកនេះលោកក៏បានដឹងពីកំហុសដែលខ្លួនបានសាងកន្លងមក និងមានបំណងចង់វិលចូលសិល្បៈវិញក៏ត្រូវបានអ្នកគាំទ្ររបស់តារាចម្រៀងរូបនេះនៅតែស្វាគមន៍ និងចាំគាំទ្រលោកដូចពេលមុនដែរ ប៉ុន្តែទស្សនិកជនក៏កំពុងរងចាំមើលដែរថាតើលើកនេះលោកអាចនឹងកែប្រែខ្លួនបាន ហើយមិនដើរលើផ្លូវខុសជាលើកទី ៣ ឬយ៉ាងណា ៕
