នេះបានហៅថា ឧកញ៉ាចិត្តធម៌មែន សូមចូលរួមត្រេកអរគុនខ្មែរ
កាលពីម្សិលមិញក្រុមការងាររបស់លោកឧកញ៉ា ស្រី ចាន់ថន បានជូនប្រាក់ឧបត្ថម្ភទៅដល់កីឡាករគុនខ្មែរ ចាន់ ហាវ និងលោកអាជ្ញាកណ្តាល វង់ ស៊ីថៃ ដើម្បីជាការលើកទឹកចិត្តដល់ពួកគាត់ ដែលបានរង់របួសក្នុងអំឡុងពេលប្រកួតកន្លងទៅ។
លោកឧកញ៉ា ស្រី ចាន់ថន បាននិយាយថា៖ ខ្ញុំបានត្រៀមលក្ខណៈរួចជាស្រេច ដើម្បីជួយទាំងកីឡាករល្បី កីឡាករមិនទាន់ល្បី កីឡាករឈ្នះ កីឡាករចាញ់ និងអាជ្ញាកណ្តាលផងដែរ។ ព្រោះបើយើងនាំគ្នាជួយតែកីឡាករល្បី ចុះកីឡាករដែលគ្នាខិតខំប្រឹងប្រែងតែមិនទាន់ល្បី គ្នាមានទឹកចិត្តឯណាខិតខំបន្តទៀត? បងប្អូនកីឡាតែងតែមានឈ្នះ មានចាញ់ តែសំខាន់យើងជាអ្នកគាំទ្រត្រូវតែបន្តលើកទឹកចិត្តពួកគាត់ បើទោះបីជាគាត់ចាញ់ឬឈ្នះក៏ដោយ។
លោកឧកញ៉ា បានបន្តទៀតថា៖ អាជ្ញាកណ្តាលក៏ដូចគ្នាបងប្អូន គាត់ឆ្លងកាត់ការហ្វឹកហ្វឹនច្រើនណាស់ទម្រាំបានក្លាយជាអាជ្ញាកណ្តាល ដូច្នេះយើងត្រូវជួយលើកទឹកចិត្តគាត់ដូចគ្នា។ នៅពីក្រោយភាពជោគជ័យរបស់កីឡាករជាច្រើន ក៏មានការរួមចំណែកយ៉ាងធំពីលោកអាជ្ញាកណ្តាលផងដែរ។ ដូច្នេះខ្ញុំសង្ឃឹមថាបងប្អូននឹងមើលឃើញអំពីគុណសម្បត្តិរបស់លោកអាជ្ញាកណ្តាលដូចគ្នា។
សូមបញ្ជាក់ថា លោកឧកញ៉ា ស្រី ចាន់ថន មួយរយៈចុងក្រោយនេះ បន្ទាប់ពីលោកបានបង្កើតឡើងនូវក្លិបគុនខ្មែរពិភពលោករបស់គាត់រួចមក និងក្នុងនាមជាអនុប្រធានសហព័ន្ធកីឡាគុនខ្មែរផងនោះ អ្នកជំនួញជោគជ័យម្នាក់នេះ តែងបង្ហាញវត្តមានគាំទ្រ និងផ្តល់ជំនួយផ្សេងៗ សម្រាប់វិស័យគុនខ្មែរ ហើយតែងតែចែករំលែកសកម្មភាពរបស់លោក នៅលើទំព័រហ្វេសប៊ុកផ្ទាល់របស់គាត់ផងដែរ។ កម្ពុជា បើសិនជាមានឧកញ៉ាស្រី ចាន់ថន តែ១០០នាក់ មិនដឹងថា វិស័យគុនខ្មែរ រីកចម្រើនកំរិតណានោះទេ៕