ខាន់ ចេសា នឹងប្រកួតវិញ្ញាសាជឺជីតស៊ូជាលើកទី២ នៅសុីហ្គេម
កីឡាការិនី ខាន់ចេសា នឹងប្រកួត ១វិញ្ញាសារទៀត ក្នុងព្រឹត្តិការណ៍កីឡាស៊ីហ្គេម លើកទី៣២នេះ ខណៈការប្រកួតថ្ងៃទី៤ ខែឧសភា ឆ្នាំ២០២៣ម្សិលមិញ បានត្រឹមមេដាយប្រាក់ ក្នុងវិញ្ញាសា Ne-Waza ទម្ងន់-៥២គីឡូក្រាម ដោយចាញ់កីឡាការិនី ភីលីពីន ត្រឹមតែ២ពិន្ទុប៉ុណ្ណោះ។
បើទោះជានាងរងការបរាជ័យនៅក្នុងវគ្គផ្តាច់ព្រ័តកាលពីម្សិលមិញក៏ពិតមែន ប៉ុន្តែកីឡាការិនីកម្ពុជាវិញ្ញាសារជឺជីតស៊ូ ខាន់ ចេសា របស់យើងរូបនេះ ពិតជាធ្វើបានយ៉ាងល្អក្នុងវគ្គជម្រុះដោយបិទគូប្រកួតត្រឺមពិន្ទុ០ គ្រប់ការប្រកួតផងដែរ។ យ៉ាងណាមិញ ខាន់ ចេសា នឹងត្រូវប្រកួតជាលើកទី២ ក្នុងវិញ្ញសារជឺជីតស៊ូ Ne-Waza GI ទម្ងន់-៥២គីឡូក្រាមដដែល និងសង្ឃឹមថា គ្រាប់ពេជ្រកម្ពុជា រូបនេះនឹងធ្វើបានល្អដូចប្រកួតមុនៗ ព្រមទាំងទទួលបានមេដាយមាសជូនជាតិមាតុភូមិកម្ពុជា ស្របតាមបំណងរបស់នាងផងដែរ។
គួរបញ្ចាក់ផងដែរថា ចេសា ធ្លាប់បានប្រាប់សារព័ត៌មានមុនការប្រកួតថា នឹងយកមេដាយមាសចំនួនពីរជូនដល់កម្ពុជា សម្រាប់ឱកាសធ្វើជាម្ចាស់ផ្ទះស៊ីហ្គេមនៅឆ្នាំ២០២៣នេះ ប៉ុន្តែរូបគេបានរបូតមេដាយមាសមួយបាត់ទៅហើយ យើងនឹងរង់ចាំមើលទាំងអស់គ្នាថា តើនាងអាចធ្វើបានល្អឬយ៉ាងណាសម្រាប់វិញ្ញសារចុងក្រោយនេះ?