លោក Tommy Kim ធ្វើសមាហរណកម្មគុនខ្មែរ ដែលអាចប្រកួត ឃីគប៊ុកស៊ីង និង MMA បាន…
លោក Tommy Kim ប្រធាន IPCC Kun Khmer ប្រាប់ពីការរចនាសង្វៀន ៨ជ្រុង ក្នុងគោលបំណង ២យ៉ាងគឺ ការធ្វើសមាហរណកម្មគុនខ្មែរ ទៅលើឆាកអន្ដរជាតិ និងការផ្សព្វផ្សាយពីក្បាច់គុនខ្មែរ ដែលអាចប្រកួតបានគ្រប់ទម្រង់។
ពិតណាស់ នៅក្នុងសន្និសីទសារព័ត៌មាន ស្ដីពីសង្វៀនមូល «King of the Ring Kun Khmer» នៅស្ថានីយ៍ទូរទស្សន៍ថោន កាលពីថ្ងៃទី៨ ខែកុម្ភៈ ឆ្នាំ២០២៤ លោក Tommy Kim បាននិយាយថា៖ “ការរៀបចំប្រដាល់គុនខ្មែរ-អន្ដរជាតិភាគច្រើន បានសម្រេចជោគជ័យ ដោយមានអ្នកគាំទ្រជាច្រើន នៅទីលានប្រកួតផ្ទាល់ និងតាមបណ្ដាលការផ្សាយលើបណ្ដាញសង្គម ចំណែកការរចនាសង្វៀនកន្លងមក សុទ្ធតែបង្កប់អត្ថន័យ ដែលបង្ហាញពីយុទ្ធសាស្ដ្រ នៃទម្រង់ក្បាច់គុនខ្មែរ ដូចជាសង្វៀន ៨ជ្រុង ដែលយកតាមក្បួនយន្ដ ៨ទិស រីឯ សង្វៀនរាងមូលនេះ ជាសង្វៀនកងចក្រ”។
គាត់បានបន្ថែមទៀតថា៖ “យើង មិនមែនមានតែសង្វៀន ៤ជ្រុង ដែលវាយតាមបែបគុនខ្មែរ បន្ទាប់មកទៀត យើងបានរចនាជាសង្វៀន ៨ជ្រុង ដែលយកតាមក្បួនយ័ន្ដ ៨ទិស នៃបុព្វបុរសខ្មែរយើង ហើយយើងបានទទួលជោគជ័យលើសង្វៀនរបស់យើង ឥឡូវនេះយើងបានចេញសង្វៀនមួយទៀត ដែលនិយាយតាមខ្មែរបុរាណ ហៅថាសង្វៀនកងចក្រ ដែលមានការប្រកួតថ្មីៗ រួមបញ្ចូល ហើយការធ្វើសង្វៀនមូល គឺមិនត្រឹមតែបង្កប់អត្ថន័យបែបនេះទេ ប៉ុន្ដែក៏មានគោលដៅក្នុងការធ្វើសមាហរណកម្មវិស័យកីឡាមួយនេះ ទៅជាក្បាច់គុនមួយសម្រាប់ពិភពលោកឲ្យកាន់តែជ្រាល់ជ្រៅ”។
លោក Tommy Kim បានបន្តទៀតថា៖ “ពេលនេះ គឺយើង ត្រូវធ្វើសមាហរណកម្មកីឡាករគុនខ្មែរ ក្បាច់គុនខ្មែរ ទៅក្នុងពិភពលោក កាន់តែជ្រាលជ្រៅជាងនេះ យើងធ្វើសង្វៀនមូលនេះ ឲ្យតាមស្ដង់ដារពិភពលោក ដែលមានកីឡាករឃីគប៊ុកស៊ីង MMA រួមគ្នាទាំងអស់នៅលើសង្វៀននេះមួយតែម្ដង”។
![](https://space365.sgp1.digitaloceanspaces.com/2024/02/12134408/5-3.jpg)