Legend កែវសុខផេងអាចនឹងត្រឡប់មកទីលានសារជាថ្មីវិញហើយក្រោយចូលនិវត្តន៍មួយរយះ
អ្នកចាត់ការទូទៅរបស់ក្លិបបាល់ទាត់ភ្នំពេញក្រោនលោក កែវ សុខង៉នបានហ៊ានផ្តល់កុងត្រា និងប្រាក់ខែខ្ពស់ឲ្យអតីតខ្សែប្រយុទ្ធ កែវ សុខផេងដែលជាប្អូនប្រុសរបស់ខ្លួនអោយត្រឡប់មកកាន់អាជីពបាល់ទាត់ជាមួយភ្នំពេញក្រោនសារជាថ្មីម្តងទៀត។
លោក កែវ សុខង៉នបាននិយាយក្នុងបណ្តាញសង្គមរបស់រូបលោកថា៖«បើឥឡូវមកក្រោន ខ្ញុំនឹងផ្ដល់កុងត្រាឲ្យគាត់២ឆ្នាំ ប្រាក់បៀវត្តន៍ 4k (៤ពាន់ដុល្លារ) គោរពនិងផ្ដល់អ្វីដែលគាត់លះបង់កន្លងមក។ គាត់ជួយជម្រើសជាតិកម្ពុជាយើងច្រើនណាស់»។
គួរបញ្ជាក់ថាម្ចាស់អាវលេខ ១០ សុខផេងបានប្រកបអាជីពលើកដំបូងគឺ បឹងកេត ពីឆ្នាំ ២០១២ ដល់ ២០១៥ ក្លិបនេះ រូបគេបានជួយឲ្យឈ្នះជើងឯកលីគកំពូលកម្ពុជាឆ្នាំ២០១២ បន្ទាប់មក សុខផេង បានផ្លាស់ទៅក្លឹបភ្នំពេញក្រោន ពីឆ្នាំ២០១៥ ដល់ ២០១៧ រួចក៏មានឪកាសប្រកបអាជីពក្រៅស្រុកជាលើកដំបូងក្នុងឆ្នាំ២០១៨ ប្អូនប្រុសបង្កើតរបស់ កែវ សុខង៉ន បានផ្ទេរទៅកាន់ក្លិបលីគកំពូលម៉ាឡេស៊ី PKNP។ ក្នុងឆ្នាំ២០១៨ដដែល កែវ សុខផេង បានវិលត្រឡប់មកកម្ពុជាវិញដោយបានចូលរួមជាមួយក្លិបវិសាខា។
ជាចុងក្រោយលោក កែវ សុខផេង អតីតជម្រើសជាតិកម្ពុជា និងជាខ្សែបម្រើប្រយុទ្ធវិសាខា បានសម្រេចចិត្តចូលនិវត្តន៍ កាលពីដើមខែមេសា ឆ្នាំ២០២៣ ដោយសារតែរបួសរាំរៃ។
