អីយ៉ាស់! ក្លិបនៅអង់គ្លេសមួយនេះ កំពុងពិចារណាយក Maguire
ក្លិបមាន់ខ្នាយមាស Tottenham Hotspur និងពិចារណាលើការចុះហត្ថលេខាលើប្រធានក្រុម Manchester United កីឡាករ Harry Maguire នៅរដូវក្តៅនេះ។ ខ្សែការពារវ័យ ៣០ឆ្នាំទំនងជាចាកចេញពីទឹកដី Old Trafford នៅរដូវក្តៅនេះ បន្ទាប់ពីរយៈពេល ៤ឆ្នាំដែលស្នាក់នៅជាមួយក្រុមបិសាចក្រហម ហើយរូបគេនៅតែរក្សាកំណត់ត្រាជាខ្សែការពារថ្លៃបំផុតលើលោក ដែលក្លិបដឹកនាំដោយលោក Ten Heg បានបញ្ចេញទឹកប្រាក់ ៨០លានផោនដើម្បីចុះហត្ថលេខាលើកីឡាករសញ្ជាតិអង់គ្លេសរូបនេះពីក្លិប Leicester City ក្នុងឆ្នាំ ២០១៩។
យ៉ាងណាមិញ ការបង្ហាញទម្រង់លេងរបស់ Maguire ក្នុងរយៈពេលប៉ុន្មានឆ្នាំកន្លងមកនេះ បានទទួលរងការរិះគន់យ៉ាងខ្លាំងពីសំណាក់អ្នកគាំទ្រ និងមិត្តរួមក្រុម។ អ្នកចាត់ការទូទៅលោក Erik ten Hag ពេញចិត្តភាពជាដៃគូ របស់ខ្សែការពារកណ្តាលកីឡាករ Raphael Varane និង Lisandro Martinez ជាង Maguire ចាប់តាំងពីលោកមកដឹកនាំ។ ទន្ទឹមនឹងនេះ ខ្សែការពាររូបបានបង្ហាញខ្លួនលើទីលានត្រឹមតែ ១៦ប្រកួតប៉ុណ្ណោះសម្រាប់ Manchester United ក្នុងរដូវកាល ២០២២-២៣ ។
គួរបញ្ជាក់ថា Harry Maguire ត្រូវបានគេមើលឃើញថា ធ្លាក់ទម្រង់លេងតាំងពីពេលដែលជំនាន់លោក Ole នៅដឹកនាំមកម្លេះ ហើយការបង្ហាញខ្លួនលើទីលានសរុបគិតមកទល់ពេលនេះឲ្យបិសាចក្រហមជាង ១៧៥លើក ស៊ុតបញ្ចូលទី៧គ្រាប់៕