Mason Greenwood ផ្តល់តម្រុយអំពីអនាគតរបស់គាត់ជាមួយ Manchester United
ខ្សែប្រយុទ្ធ Mason Greenwood របស់ក្រុម Manchester United បានដាក់ផ្ទះរបស់គាត់នៅ Cheshire សម្រាប់ជួល នេះបើយោងតាមកាសែត The Sun ហើយប្រភពមួយនេះបានបន្ថែមទៀតថាខ្សែប្រយុទ្ធរូបនេះអាចនឹងចាកចេញពីក្លិបនៅរដូវក្ដៅនេះ។
Greenwood មិនបានបង្ហាញខ្លួនសម្រាប់បិសាចក្រហមចាប់តាំងពីខែមករាឆ្នាំ ២០២២ នៅពេលដែលគាត់ត្រូវបានចាប់ខ្លួនដោយចោទប្រកាន់ពីបទប៉ុនប៉ងរំលោភ ហើយការចោទប្រកាន់ប្រឆាំងនិងគាត់នោះ នៅទីបំផុតត្រូវបានទម្លាក់ដោយអយ្យការ Crown ក្នុងខែកុម្ភៈឆ្នាំ ២០២៣ ជុំវិញ “ការដកសាក្សីសំខាន់ៗ”។ Greenwood ត្រូវបានគេរាយការណ៍ថាត្រូវបានគេប្រទះឃើញនៅលើទីលានហ្វឹកហាត់សាធារណៈ ជាមួយគ្រូបង្វឹកឯកជនកាលពីថ្ងៃព្រហស្បតិ៍ទី ២២ ខែមិថុនាកន្លងទៅ ដោយកាសែត Daily Mail បានរាយការណ៍នៅដើមខែនេះថា Manchester United កំពុងមានការសន្ទនាលើការបញ្ជូនកីឡាកររូបនេះក្នុងលក្ខខណ្ឌខ្ចីជើងទៅអ៊ីតាលី អេស្ប៉ាញ ឬទួរគី។
គួររំឮកថា Mason Greenwood គឺជាកីឡាករឈុតយុវជនរបស់ United ដែលបានជាប់ក្នុងក្រុមធំ ហើយក៏បានស៊ុតបញ្ចូលទីបាន ៣៥ គ្រាប់ក្នុងការបង្ហាញខ្លួន ១៣២ លើកសម្រាប់បិសាចក្រហមផងដែរ។
