ជាផ្លូវការក្លិប PSG បានចុះកុងត្រាជាមួយកីឡាករ Marco Asensio
កាលពីម្សិលមិញក្លិប Paris Saint-Germain បានប្រកាសជាផ្លូវការក្នុងការនាំយកខ្សែប្រយុទ្ធរបស់ប្រទេស អេស្ប៉ាញ ចូលរួមជាមួយខ្លួនគឺកីឡាករ Marco Asensio បន្ទាប់ពីរូបគេបានចាកចេញពីក្លិបអធិរាជស Real Mdrid ក្រោយពីកុងត្រារបស់ខ្លួនអស់សុពលភាពជាមួយក្រុមមួយនេះ ។
ក្លិប PSG បាននាំយកខ្សែប្រយុទ្ធវ័យ ២៧ឆ្នាំរូបនេះចូលរួមជាមួយនឹងខ្លួនក្រោយរូបគេបានប្រកាសចែកផ្លូវជាមួយក្លិបយក្សរបស់ប្រទេស អេស្ប៉ាញ កាលពីពេលថ្មីៗនេះខ្សែប្រយុទ្ធជំនាញជើងឆ្វេង Marco Asensio បានចុះកុងត្រាជាមួយក្លិប Paris Saint-Germain រយៈពេល ៤ឆ្នាំឯណោះ ដំណឹងនេះមិនភ្ញាក់ផ្អើលឡើយក្រោយមានរបាយការណ៍ជាច្រើនបានលើកឡើងពីចំណាប់អារម្មណ៍របស់ PSG ទៅលើរូបគេជាយូរណាស់មកហើយកីឡាកររូបនេះក៏ចង់ចូលរួមជាមួយក្លិបយក្ស បារាំង ដូចគ្នា ។
គួរបញ្ជាក់ផងដែរថា Asensio បានចាកចេញពី Real Madrid បន្ទាប់ពីចំណាយពេលប្រមាណ ៧ រដូវកាលជាមួយនឹងក្រុមហើយបានចូលរួមចំណែកជួយអោយក្លិបមួយនេះឈ្នះពានធំៗជាច្រើនផងដែរ ៕
