ដឹងមូលហេតុហើយ រឿងជម្រើសជាតិបាល់ទះកម្ពុជា មិនបានចូលរួមក្នុងព្រឹត្តិការណ៍ Asian Men’s Volleyball Challenge Cup 2023
ទាក់ទងនិងការប្រកួតព្រឹត្តិការណ៍ Asian Men’s Volleyball Challenge Cup 2023 ( AVB ) ធ្លាប់ត្រូវបានលោកបណ្ឌិត អាំង សេរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានបញ្ជាក់ម្ដងរួចមកហើយថា កម្ពុជាមិនទាន់មានកូតាគ្រប់គ្រាន់ក្នុងការចូលរួមឡើយ ដ្បិតថាពានរង្វាន់នេះកម្ពុជាត្រូវមានលីគបាល់ទះអាជីពជាមុនសិន ដោយពានរង្វាន់នេះគឺជាគោលដៅដែលកម្ពុជាប៉ងចូលរួមដូចប្រទេសវៀតណាម ឥណ្ឌូណេស៊ី និង ថៃ ផងដែរ។
ពិតណាស់ នៅក្នុងព្រឹត្តិការណ៍ Asian Men’s Volleyball Challenge Cup 2023 បានរកឃើញជើងឯកហើយ ដោយក្រុមជម្រើសជាតិបាល់ទះ ថៃ ជាអ្នកឈ្នះបន្ទាប់ពីលត់ក្រុមជម្រើសជាតិបាល់ទះ បារ៉ែន ៣-០ នៅវគ្គផ្ដាច់ព្រ័ត្រ ដូច្នេះពួកគេនិងត្រូវតំណាងឲ្យក្រុមប្រចាំទ្វីបអាស៊ី ទៅចូលរួមក្នុងពាន FIVB Challenger Cup នៅកាតា បន្ទាប់ទៀត នេះជាពានចម្រាញ់ក្រុមខ្លាំងចេញពីសហព័ន្ធបាល់ទះទាំង ៥ ទូទាំងសកលលោកនាចុងខែនេះ។
គួរបញ្ជាក់ផងដែរថា បើតាមការបញ្ជាក់របស់លោកបណ្ឌិត អាំង សេរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា លីគបាល់ទះកម្រិតអាជីពនៅកម្ពុជា និងលេចរូបរាងឡើង ក្នុងពេលឆាប់ៗនេះ៕