អស្ចារ្យណាស់! ពេលនេះ សហព័ន្ធបាល់ទះកម្ពុជា បើកវគ្គបណ្តុះបណ្តាលគ្រូបង្វឹកកម្រិត C ហើយ
នៅថ្ងៃទី២៦ ខែកក្កដា ឆ្នាំ២០២៣ នេះ សហព័ន្ធកីឡាបាល់ទះកម្ពុជា បានបើកវគ្គបណ្តាលគ្រូបង្វឹកបាល់ទះកម្រិត C នៅពហុកីឡដ្ឋានជាតិអូឡាំពិកដែលមានសិក្ខាកាមជាច្រើនរូបចូលរួម ដោយលោកបណ្ឌិត អាំង សិរីពិសិដ្ឋ អគ្គលេខាធិការ សហព័ន្ធកីឡាបាល់ទះកម្ពុជាបានឲ្យដឹងថា៖ “ការបើកវគ្គបណ្តុះបណ្តាលគ្រូបង្វឹកកីឡាបាល់ទះកម្រិត C ឆ្នាំ២០២៣ នេះ គឺមានការចូលរួមដោយសិក្ខាកាមដែលជាអាជ្ញាកណ្ដាល និងគ្រូបង្វឹករបស់សហព័ន្ធកីឡាបាល់ទះកម្ពុជាធ្លាប់បានរៀនសូត្រទាំងថ្នាក់ជាតិ និងអន្តរជាតិ ពេលកន្លងមក”។
ពិតណាស់ វគ្គបណ្តុះបណ្តាលនេះមានរយៈពេល ៦ថ្ងៃគិតចាប់ពីថ្ងៃទី២៦ ដល់ថ្ងៃទី៣១ ខែកក្កដា ឆ្នាំ២០២៣ ដែលសិក្ខាកាមចូលរួមមកពី វិទ្យាស្ថានជាតិអប់រំកាយ និងកីឡា-នាយកដ្ឋានរៀបចំ និងគ្រប់គ្រងព្រឹត្តិការណ៍កីឡា-សមាគម និងក្លិបកីឡាបាល់ទះចំនួន២២ ទៀត។
គួរបញ្ជាក់ផងដែរថា វគ្គបណ្តុះបណ្តាលនេះក្រោមការបង្ហាត់បង្រៀនដោយគ្រូឧទ្ទេសជនជាតិគុយបា ដែលជាគ្រូជំនួយក្រុមបាល់ទះជម្រើសជាតិកម្ពុជា និងមានការចូលរួមពីមន្ត្រីបច្ចេកទេសរបស់សហព័ន្ធកីឡាបាល់ទះកម្ពុជា ទាំងការធ្វើបទបង្ហាញទ្រឹស្តី និងអនុវត្តផ្ទាល់លើទីលាននៅពហុកីឡដ្ឋានជាតិអូឡាំពិក រាជធានីភ្នំពេញ៕