ពានរង្វាន់ បាល់ទះឯកឧត្តមបណ្ឌិត ស សុខា នឹងក្លាយជាការប្រកួតប្រជែងសម្រាប់កៅអីជម្រើសជាតិ (មានវិដេអូ)
ការប្រកួតកីឡាបាល់ទះដណ្តើមពានរង្វាន់លោក ស សុខា (Sar Sokha Challenge Cup) ប្រចាំឆ្នាំ ២០២៣ ត្រូវបានសហព័ន្ធកីឡាបាល់ទះកម្ពុជា បង្កើតឲ្យមានឡើងជាលើកដំបូង ដើម្បីផ្តល់ឱកាសឲ្យក្លិបបាល់ទះ នៅក្នុងប្រទេសកម្ពុជា បានធ្វើការប្រកួតប្រជែងគ្នា ដណ្តើមយកពាន និងប្រាក់រង្វាន់ ហើយពានមួយនេះ ក៏បានក្លាយជាវេទិកាប្រកួតប្រជែងដណ្តើមយកកៅអីក្រុមជម្រើសជាតិរបស់កីឡាករឆ្នើមៗផងដែរ។
លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បាននិយាយថា៖ “ការប្រកួតដណ្តើមពានរង្វាន់ឯកឧត្តម ស សុខា នេះ នឹងក្លាយជាការប្រកួតកម្តៅសាច់ដុំផង និងដើម្បីចម្រាញ់យកកីឡាករ ១៤ នាក់ចុងក្រោយផង ដើម្បីប្រកួតនៅស៊ីហ្គេម នាពេលខាងមុខ អ៊ីចឹងកីឡាករ ១៤នាក់ ដែលធ្លាប់មានមុខ ពេលក្រុមកម្ពុជាបាល់ទះ ឈ្នះបានមេដាយប្រាក់ កាលស៊ីហ្គេម នៅកម្ពុជា កន្លងមកនេះ អាចនឹងបាត់មុខច្រើន ទោះបីជាអ្នកនោះ មានទេពកោសល្យយ៉ាងណា តែបើគេមិនបានចូលជំរំហ្វឹកហាត់ គ្មានបេះដូង ក្នុងការដាក់ចិត្តដាក់កាយ ដើម្បីដណ្តើមកិត្យានុភាពជូនជាតិទេ អាហ្នឹងមិនអាចមានឈ្មោះជាប់ជម្រើសជាតិឡើយព្រោះធ្វើការប្រមូលផ្តុំ នៅប្រទេសចិន ទទួលប្រាក់ឧបត្ថម្ភពីជាតិ ប៉ុន្តែមិនបានបម្រើជាតិ អាហ្នឹងខ្ញុំមិនអាចទុកបានទេ”។
លោកបានបន្តទៀតថា៖ “បេក្ខភាពជម្រើសជាតិ ១៤ នាក់ចុងក្រោយនេះ អាចនឹងមានកីឡាករប្លែកៗមុខច្រើនបន្តិច ហើយក្នុងនោះ ក៏អាចនឹងមានកីឡាករកូនកាត់របស់យើងខ្លះដែរ ដើម្បីយើងដឹងថា តើគុណផល ដែលគាត់បានចូលរួមប្រកួតហ្នឹង វាបានកម្រិតណា? វាល្អជាងមុន ស្មើមុន ឬក៏អន់ជាងមុន អ៊ីចឹងវាស្ថិតនៅក្នុងដំណាក់កាលតេស្តសមត្ថភាពទាំងអស់ ហើយខ្ញុំជឿជាក់ថា ពានរង្វាន់ឯកឧត្តម ស សុខា អាចនឹងកក្រើក ព្រោះយើងបានប្រាប់ដល់ក្លិប ដែលចូលរួម អាចនាំយកកីឡាករបរទេសមកប្រកួតបាន”។
គួរបញ្ជាក់ផងដែរថា តាមរយៈចាប់ឆ្នោតកាលពីម្សិលមិញ នៅពូលA មានដូចជា៖ ក្លិបបាល់ទះវិសាខា រដ្ឋបាលរាជធានីភ្នំពេញ ស្នងការដ្ឋាននគរបាលខេត្តត្បូងឃ្មុំ កងពលធំអន្តរាគមន៍លេខ៣ និងក្រុមបញ្ជាការដ្ឋានអង្គរក្ស។ ចំណែកនៅពូលB វិញ មានដូចជា៖ ក្រុមបាល់ទះខេត្តតាកែវ ស្នងការនគរបាលខេត្តព្រះសីហនុ ស្នងការនគរបាលខេត្តបាត់ដំបង និងក្រុមស្នងការនគរបាលខេត្តកំពង់ឆ្នាំង ហើយការប្រកួត នឹងចាប់ផ្តើម នៅថ្ងៃទី ២ ខែសីហា ឆ្នាំ២០២៣ នេះតទៅ ដើម្បីរកក្រុមលេខ ១ និងលេខ ២ នៅតាមពូលទាំង ២ ឡើងទៅប្រកួតវគ្គពាក់កណ្តាលផ្តាច់ព្រ័ត្រ នៅថ្ងៃទី ៥ និងវគ្គផ្តាច់ព្រ័ត្រ នៅថ្ងៃទី ៦ ខែសីហា ឆ្នាំ២០២៣ នេះតែម្តង៕