WOW! សហព័ន្ធកីឡាបាល់ទះកម្ពុជា គ្រោងនឹងបង្កើតលីគបាល់ទះអាជីពលើកដំបូងនាពេលខាងមុខនេះ (មានវិដេអូ)
សហព័ន្ធកីឡាបាល់ទះកម្ពុជាគ្រោងនឹងបង្កើតលីគបាល់ទះអាជីពជាលើកដំបូង ដើម្បីជំរុញ និងអភិវឌ្ឍកីឡាបាល់ទះនៅកម្ពុជាឲ្យរីកចម្រើន ដូចប្រទេសជាច្រើននៅតំបន់អាស៊ាន ក៏ដូចជាពិភពលោក ដែលមានលីគបាល់ទះប្រចាំឆ្នាំ។
លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បាននិយាយថា៖ “ការបង្កើតលីគអាជីពនៅកម្ពុជា ពិតជាសំខាន់ណាស់សម្រាប់កីឡាករបាល់ទះកម្ពុជា ដើម្បីទទួលបានឱកាសច្រើនក្នុងការបង្ហាញសមត្ថភាព និងបង្កើនបទពិសោធ គម្រោងការបង្កើតលីគនេះ ដើម្បីឲ្យកីឡាករបាល់ទះជម្រើសជាតិកម្ពុជា ត្រៀមខ្លួនបានច្រើន និងល្អប្រសើរសម្រាប់ការប្រកួតលើឆាកអន្តរជាតិ ជាពិសេសក្នុងព្រឹត្តិការណ៍កីឡាទ្វីបអាស៊ី Asian Games នៅប្រទេសចិន ដែលកម្ពុជាត្រូវជួបកូរ៉េខាងត្បូង និងឥណ្ឌា ព្រមទាំងត្រៀមខ្លួនសម្រាប់កីឡាស៊ីហ្គេម ឆ្នាំ២០២៥ នៅប្រទេសថៃ ព្រមទាំងពានរង្វាន់អន្តរជាតិផ្សេងៗទៀតផងដែរ”។
ពិតណាស់ ប៉ុន្មានឆ្នាំចុងក្រោយនេះ ក្រុមបាល់ទះជម្រើសជាតិកម្ពុជា ធ្វើបានយ៉ាងល្អក្នុងព្រឹត្តិការណ៍កីឡាស៊ីហ្គេម ដោយបានឈានដល់វគ្គពាក់កណ្តាលផ្តាច់ព្រ័ត្រ ឆ្នាំ២០២២ នៅប្រទេសវៀតណាម ទទួលបានមេដាយសំរិទ្ធ និងឆ្នាំ២០២៣ ឡើងដល់វគ្គផ្តាច់ព្រ័ត្រទទួលបានមេដាយប្រាក់ មុនពេលទទួលបានជោគជ័យ ក្រុមបាល់ទះជម្រើសជាតិកម្ពុជា បានធ្វើការប្រកួតមិត្តភាពអន្តរជាតិជាច្រើន ជាមួយក្រុមខ្លាំងៗមកពីប្រទេសបារាំង គុយប៉ា ចិន និងសិង្ហបុរី ជាដើម នៅពេលនេះ ក្រុមបាល់ទះកម្ពុជា បានបោះជំហានចូលកីឡាទ្វីបអាស៊ីជាលើកដំបូង បន្ទាប់ពីខកខានអស់រយៈពេលជិត ៥០ឆ្នាំ ហើយបើគិតចាប់តាំងពីធ្លាប់ចូលរួមប្រកួតចុងក្រោយ កាលពីឆ្នាំ១៩៧០។
គួរបញ្ជាក់ផងដែរថា លីគបាល់ទះអាជីពលើកដំបូងរបស់កម្ពុជានេះ ជាពានរង្វាន់ធំលំដាប់ទី១ បន្ទាប់ពីពានរង្វាន់ ស សុខា ពានរង្វាន់កម្រិតភូមិភាគ និងពានរង្វាន់សម្តេចក្រឡាហោម ស ខេង៕