បាល់ទះបុរសកម្ពុជា បើកឆាកប៉ះយក្សឥណ្ឌា មុនបន្តជួបកូរ៉េខាងត្បូង នៅ Asian Games
ការចាប់ឆ្នោតបែងចែកពូលនៃព្រឹត្តិការណ៍កីឡាអាស៊ី Asian Games លើកទី១៩ នៅប្រទេសចិន គេឃើញថាក្រុមបាល់ទះក្នុងសាលបុរសកម្ពុជា ស្ថិតក្នុងពូលជាមួយក្រុមយក្សឥណ្ឌា និងជើងខ្លាំងកូរ៉េខាងត្បូង ខណៈការប្រកួតនឹងចាប់ដំណើរការនៅខែក្រោមនេះហើយ។
ពិតណាស់ បាល់ទះបុរស មានប្រទេសចំនួន ១៩ បានចុះឈ្មោះបញ្ជូនក្រុមអត្តពលិករបស់ខ្លួនទៅដណ្តើមយកមេដាយក្នុងឆ្នាំនេះ ខណៈគណៈកម្មការរៀបចំការប្រកួតបានបែងចែកទៅជា ៦ពូលផ្សេងៗគ្នា សម្រាប់ពូល C ដែលមានកម្ពុជា ឥណ្ឌា និងកូរ៉េខាងត្បូង នឹងត្រូវធ្វើការប្រកួត៖
- ថ្ងៃទី ១៩ ខែកញ្ញា ឆ្នាំ២០២៣ ម៉ោង ៦ល្ងាច ឥណ្ឌា ប៉ះ កម្ពុជា នៅទីលាន China Textile City Sports Centre Gymnasium
- ថ្ងៃទី ២០ ខែកញ្ញា ឆ្នាំ២០២៣ ម៉ោង ៦ល្ងាច កូរ៉េខាងត្បូង ប៉ះ ឥណ្ឌា នៅទីលាន Linping Sports Centre Gymnasium
- ថ្ងៃទី ២១ ខែកញ្ញា ឆ្នាំ២០២៣ ម៉ោង ២ៈ៣០នាទី កម្ពុជា ប៉ះ កូរ៉េខាងត្បូង នៅទីលាន Linping Sports Centre Gymnasium
យ៉ាងណាមិញ ក្រុមចំណាត់ថ្នាក់លេខ ១ និងលេខ ២ តាមពូលនីមួយៗ មានឈ្មោះឡើងទៅវគ្គ ១៦ក្រុមចុងក្រោយ ដោយស្វែងរកកៅអីទៅដណ្តើមមេដាយមាសប្រចាំព្រឹត្តិការណ៍ ហើយព្រឹត្តិការណ៍ Asian Games រៀបចំឡើងដំបូងនៅឆ្នាំ១៩៥១ ស្របពេលដែលវិញ្ញាសាបាល់ទះ បានដាក់ឲ្យប្រកួតប្រជែងពីឆ្នាំ១៩៥៨ សម្រាប់កម្ពុជាវិញ នេះជាលើកទី ៣ហើយ ដែលបញ្ជូនក្រុមបាល់ទះបុរសទៅចូលរួមប្រកួតក្នុងព្រឹត្តិការណ៍កីឡា Asian Games ដោយលើកទី១ នៅឆ្នាំ១៩៦២ ដែលប្រទេសឥណ្ឌូណេស៊ី ធ្វើជាម្ចាស់ផ្ទះ ដោយឈរលេខ៧ ហើយលើកទី២ ក្នុងឆ្នាំ១៩៧០ ដែលប្រទេសថៃ ទទួលធ្វើម្ចាស់ផ្ទះកម្ពុជា ទទួលបានចំណាត់ថ្នាក់លេខ៤ ស្របពេលដែលមេដាយមាសបានទៅជប៉ុន មេដាយប្រាក់បានទៅកូរ៉េខាងត្បូង និងមេដាយសំរឹទ្ធិបានទៅចិន។
គួរបញ្ជាក់ផងដែរថា តាំងពីដាក់វិញ្ញាសាបាល់ទះចូលក្នុងកីឡាអាស៊ី មកឃើញថាជប៉ុន ឈ្នះមេដាយមាស ៨ជំនាន់ម្នាក់ឯង ច្រើនជាងប្រទេសដទៃ ខណៈកូរ៉េខាងត្បូង ជាក្រុមខកចិត្តវគ្គផ្ដាច់ព្រ័ត្រ ៧លើក ពោលគឺបានត្រឹមមេដាយប្រាក់ និងធ្លាប់ឈ្នះមេដាយមាស ៣លើក ស្មើនឹងក្រុមយក្សចិន៕