មានការលំបាកខ្លាំងសម្រាប់ការប្រកួតដំបូងរបស់ក្រុមជម្រើសជាតិកម្ពុជា
ការប្រកួតសម្រាប់ជម្រើសជាតិកម្ពុជាក្រោយអាយុ ២២ឆ្នាំ នៅក្នុងព្រឺត្តិការណ៍សុីហ្គេម ថ្ងៃស្អែកនេះ ក្នុងពូល A ក្រុមជម្រើសជាតិកម្ពុជា នឹងបើកទ្វាកីឡដ្ឋានស្វាគមន៍ក្រុមជម្រើសជម្រើសជាតិទីម័រ នាពហុកីឡដ្ឋានជាតិអូឡាំពិក ចាប់ពីម៉ោង ៧:០០នាទីយប់តទៅ។
នៅក្នុងសន្និសីទកាសែតកាលពីព្រឹកមិញ លោក Ryu Hirose ជាគ្រូបង្គោលរបស់ក្រុមជម្រើសជាតិកម្ពុជា បានលើកឡើងមុនការប្រកួតថា «គ្រប់ព្រឹត្តិការណ៍ប្រកួតទាំងអស់រួមទាំងស៊ីហ្គេមនេះផងដែរ ការប្រកួតដំបូង គឺជាការប្រកួតដ៏លំបាកមួយ ប៉ុន្តែក្រុមរបស់យើងបានត្រៀមខ្លួនយ៉ាងល្អ។ សម្រាប់លទ្ធផលវិញ យើងមិនអាចទាន់និយាយឡើយ វាអាស្រ័យថា យើងគ្រប់គ្រងស្ថានការណ៍ក្នុងការលេងបានបែបណា»។
ចំណែកលោក Park Soon Tae គ្រូរបស់ជម្រើសជាតិទីម័រ ក៏បានលើកឡើងដែរថា «សម្រាប់ការប្រកួតនៅថ្ងៃស្អែក ក្រុមរបស់លោកនឹងលេងដោយភាពរីករាយ ហើយការលេងជាមួយម្ចាស់ផ្ទះ គឺជាការប្រកួតមួយដ៏ល្អ។ ទីម័របានរៀបចំខ្លួនតាំងពី ២-៣ ខែមុនមកម្ល៉េះ ហើយក្រុមទាំងមូលនឹងលេងដោយភាពរីករាយជាមួយកម្ពុជា»។
គួរបញ្ចាក់ផងដែរថា នៅថ្ងៃសៅរ៍ទី ២៩ ខែ៤ ឆ្នាំ ២០២៣ ស្អែកនេះ នឹងមានការប្រកួតវិញ្ញសារបាល់ទាត់ក្នុងព្រឹត្តការណ៍សុីហ្គេមលើកទី៣២ ហើយការប្រកួតក្នុងគូរទីមួយ ក្រុមជម្រើសជាតិឥណ្ឌូណេស៊ីក៏ត្រូវប៉ះគ្នាជាមួយហ្វីលីពីន វេលាម៉ោង៤:០០ និងគូរទី២ គឺជាការប្រកួតរបស់ក្រុមម្ចាស់ផ្ទះ និងត្រូវប៉ះក្រុមទីម័រ នៅវេលាម៉ោង៧:០០យប់តរទៅ៕