មហាជនកំពុងចាប់អារម្មណ៍លើប្រវត្តិបុរសម្នាក់នេះ ដែលជាអ្នកការពារកីឡាករ Messi ស្ទើគ្រប់វិនាទី
ក្រោយបានឃើញវីដេអូឃ្លីបមួយ ត្រូវបានចែករំលែកលើបណ្តាញទំនាក់ទំនងសង្គម ធ្វើឲ្យអ្នកគ្រប់គ្នាពិតជាចង់ដឹងខ្លាំងណាស់ថា តើបុរសម្នាក់មាឌមាំ ធំដំបង ដែលតែងតែដើរការពារកំពូលខ្សែប្រយុទ្ធអាហ្សង់ទីន Lionel Messi
រូបនោះជានរណា និងមានប្រវត្តិបែបណាខ្លះ ទើបលោក David Beckham ទុកចិត្តយកមកការពារតារាឆ្នើមរូប?
យោងតាមប្រភពពីកាសែត La Nacion របស់អាហ្សង់ទីនបានទម្លាយជីវប្រវត្តិត្រួសៗ របស់អង្គរក្សរូបនោះ ដែលមានឈ្មោះថា Yassine Chueko គឺជាអតីតទាហានជើងទឹករបស់សហរដ្ឋអាមេរិក (Navy Seal) ដែលមានបទពិសោធន៍នឹងការប្រយុទ្ធ នៅក្នុងប្រទេសអ៊ីរ៉ាក់ និងអាហ្វហ្គានីស្ថាន ជាមួយជំនាញក្បាច់គុន តេក្វាន់ដូ ប្រដាល់ និងធ្លាប់ចូលរួមរប្រកួតកីឡាគុនចម្រុះ MMA និងប្រដាល់សេរីជាច្រើនលើកផងដែរ។
ការសម្រេចចិត្តរបស់លោក Beckham ជ្រើសរើស Chueko ដែលមានជំនាញការពារខ្ពស់ កើតឡើងចំពេលមានការកើនឡើងខ្លាំង នៃចំនួនអ្នកគាំទ្ររត់ចូលទីលានអំឡុងពេលប្រកួតនៅប៉ុន្មានឆ្នាំថ្មីៗនេះ ហើយដោយពិចារណាលើការគាំទ្រដ៏ពុះកញ្ជ្រោលមិនគួរឱ្យជឿរបស់ Messi សម្រាប់ការមកប្រកបអាជីពនៅសហរដ្ឋអាមេរិក នេះគឺជាជម្រើសដ៏សំខាន់បំផុត ដែលត្រូវធ្វើជាចាំបាច់។
ផ្នែកមួយនៃការងាររបស់លោក Chueko គឺការឃ្លាំមើល Messi ជាប់គ្រប់វិនាទីទាំងអស់ អំឡុងពេលប្រកួត ដូច្នេះអ្នកការពាររូបនេះ អាចស្ទាក់ចាប់អ្នកគាំទ្រអុកឡុកក្នុងទីលាន ដែលព្យាយាមចូលទៅជិតប្រធានក្រុម Inter Miami រូបនេះ។ អង្គរក្សរូបនេះ ក៏ត្រូវការពារ Messi មុន និងក្រោយការប្រកួតផងដែរ មិនថាពេលដើរចេញពីឡានក្រុងរបស់ក្រុម ទៅបន្ទប់ផ្លាស់សំលៀកបំពាក់ គាត់តែងតែស្ថិតនៅជាប់ជានិច្ច។ ពិសេសជាងនេះទៅទៀត គឺនៅពេលដែល Messi ចេញក្រៅជាមួយគ្រួសារនៅទីសាធារណៈ ដូចជាដើរផ្សារទិញទំនិញជាដើម Chueko ត្រូវតែបង្កើនការការពាររបស់ខ្លួន។
គួររំឭកថា ខណៈពេលនេះកំពូលខ្សែប្រយុទ្ធអាហ្សង់ទីន Lionel Messi ដែលមានអង់រក្សការពារគ្រប់វិនាទីរូបនេះ ក៏កំពុងរីករាយជាមួយជោគជ័យជាបន្តបន្ទាប់របស់ខ្លួន សម្រាប់អាជីពនៅសហរដ្ឋអាមេរិកជាមួយក្លិប Inter Miami ដែលមានលោក David Beckham ជាសហម្ចាស់ក្លិបនៅលីគកំពូលសហរដ្ឋអាមេរិកមួយនេះ។ តួយ៉ាង Messi បានដើរតួយ៉ាងខ្លាំងក្នុងជ័យជម្នះរបស់ក្រុម Inter Miami លើក្រុម Cincinnati តាមរយៈការទាត់បាល់ប៉េណាល់ទីកាត់សេចក្តីលទ្ធផល ៥-៤ កាលពីថ្ងៃទី២៤ ខែសីហា ថ្មីៗនេះ និងត្រៀមបន្តឡើងទៅវគ្គផ្តាច់ព្រ័ត្រពានរង្វាន់ US Open Cup ដោយត្រូវប៉ះក្រុម Houston Dynamo នៅថ្ងៃទី២៧ ខែសីហា ឆាប់ៗខាងមុខនេះផងដែរ៕
https://www.instagram.com/p/ClwQ9pRhRF3/
