ក្រុមបាល់ទះនារី ថៃ ឈ្នះជើងឯកអាស៊ីឆ្នាំ២០២៣ ក្រោយឈ្នះ ចិន នៅវគ្គផ្តាច់ព្រ័ត្រ
ក្រុមបាល់ទះជម្រើសជាតិនារី ថៃ បានគ្រងជើងឯកបាល់ទះនារីអាស៊ី ឆ្នាំ២០២៣ (Asian Senior Women’s Championship) លើកទី២២ បន្ទាប់ពីបានប្រកួតឈ្នះក្រុមបាល់ទះជម្រើសជាតិនារី ចិន ដោយលទ្ធផល ៣-២ នៅវគ្គផ្តាច់ព្រ័ត្រកាលពីល្ងាចថ្ងៃទី៦ ខែកញ្ញា ឆ្នាំ២០២៣។
ពិតណាស់ នៅវគ្គសន្សំពិន្ទុក្នុងពូល ក្រុមបាល់ទះនារី ថៃ បានយកឈ្នះក្រុមនារី អូស្ត្រាលី ៣-០ និងឈ្នះក្រុមបាល់ទះនារី ម៉ុងហ្គោលី ៣-០ ហើយនៅវគ្គខ្វែង ក្រុមបាល់ទះនារី ថៃ បានយកឈ្នះក្រុមបាល់ទះនារី កូរ៉េខាងត្បូង ដោយលទ្ធផល ៣-០ និងឈ្នះក្រុមបាល់ទះនារី វៀតណាម ដោយលទ្ធផល ៣-១ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ ហើយពួកគេបានបន្តយកឈ្នះក្រុមខ្លាំង ជប៉ុន ដោយលទ្ធផល ៣-២ សម្រាប់ឡើងទៅកាន់វគ្គផ្តាច់ព្រ័ត្រ។
យ៉ាងណាមិញ នៅវគ្គផ្តាច់ព្រ័ត្រ ក្រុមបាល់ទះនារី ថៃ បានយកឈ្នះក្រុមខ្លាំងនារី ចិន ដោយលទ្ធផល ៣-២ ដើម្បីគ្រងជើងឯកបាល់ទះនារីអាស៊ី ឆ្នាំ២០២៣ លើកទី២២ នេះតែម្តង ហើយនេះក៏ជាកំណត់ត្រាថ្មីមួយសម្រាប់ក្រុមបាល់ទះនារី ថៃ ដោយមិនស្គាល់បរាជ័យម្តងណាសោះរហូតឈ្នះជើងឯកប្រចាំឆ្នាំ២០២៣ នេះ។
គួរបញ្ជាក់ផងដែរថា ក្រុមបាល់ទះនារី ចិន ទទួលបានចំណាត់ថ្នាក់លេខ២ និងក្រុមបាល់ទះនារី ជប៉ុន ទទួលបានចំណាត់ថ្នាក់លេខ៣ ហើយការឈ្នះជើងឯកបាល់ទះនារីអាស៊ី ឆ្នាំ២០២៣ នេះ ជាលើកទី៣ ហើយដែលក្រុមបាល់ទះនារី ថៃ បានឈ្នះ គឺការឈ្នះលើកទី១ នៅឆ្នាំ២០០៩ និងឈ្នះលើកទី២ ឆ្នាំ២០១៣៕