ប្រធានក្លិបចក្រវាឡគុនខ្មែរ បារម្ភពីការធ្លាក់កម្លាំងរបស់កីឡាការិនី ស្រីនី ដែលហាត់ផង ធ្វើការរោងចក្រផង

ពិតណាស់ កីឡាការិនី ធឿន ស្រីនី បានចាញ់ កីឡាការិនី សាក់ រតនា លើការប្រកួត ៣ទឹក ប្រភេទទម្ងន់ ៤៥គីឡូក្រាម ក្នុងការប្រកួតនេះ កីឡាការិនី ធឿន ស្រីនី ហាក់ដូចជាកម្លាំងថមថយខ្លាំង ក៏ប៉ុន្ដែ អាចទ្រាំរហូត បានចប់ ៣ទឹក ក្នុងនោះប្រធានក្លិបចក្រវាឡគុនខ្មែរលោកគ្រូ រស់ សុជា​ បាននិយាយថា៖ “ធឿន ស្រីនី អាចនឹងឆាប់ធ្លាក់កម្លាំងស្ទុះ ក្នុងការប្រកួត ប្រសិនជាមិនមានពេលគ្រប់គ្រាន់ ដើម្បីសម្រាក់ និងបំប៉នសុខភាព។ ហើយលោកបានបន្តទៀតថា៖ ពេលវេលាគាត់ សម្រាក តិចពេក ខ្ញុំពិបាកធ្វើឲ្យគាត់រឹងមាំ គាត់ធ្វើការម៉ោង ៧ព្រឹក ហើយ ៧ យប់បានមានពេលហាត់ គាត់ធ្វើការពេញៗថ្ងៃ ដូច្នេះ ការសម្រាក ការរត់ គឺបានតិចតួចមែនទែន”។

គួរបញ្ជាក់ផងដែរថា កីឡាការិនី ធឿន ស្រីនី ប្រឡូកក្នុងវិស័យប្រដាល់គុនខ្មែរ នៅខែកុម្ភៈ ឆ្នាំ២០២៣ ហើយប្រកួត បាន ៦លើក ក្នុងនោះ ឈ្នះ ៤ និងចាញ់២ ហើយកីឡាការិនីរូបនេះ មានទីលំនៅភូមិឆ្មាពួន ឃុំជើងកើប ស្រុកកណ្ដាលស្ទឹង ខេត្តកណ្ដាល៕