WOW! ក្របីព្រៃ ពេជ្រ សម្បត្តិ បានបំបែកឯកត្តកម្មចំនួនពីរ ក្នុងរយៈពេល ២,៥ ឆ្នាំប៉ុណ្ណោះ
ក្នុងរយៈពេលត្រឹម ២,៥ ឆ្នាំ ក្របីព្រៃ ពេជ្រ សម្បត្តិ បានសាងកេរ្តិ៍ឈ្មោះល្បីល្បាញពេញប្រទេស និងទាក់ទាញប្រជាប្រិយភាពឡើងលឿនបំផុត ដែលនេះមិនមែនជារឿងធម្មតានោះឡើយ ហើយប្រសិនបើគាត់បន្តខំប្រឹងហ្វឹកហាត់ និងថែទាំខ្លួនបានល្អនោះ អនាគតកាន់ខ្លាំង។
ពិតណាស់ នៅក្នុងរយៈពេល ២,៥ ឆ្នាំមកនេះ ក្របីព្រៃ ពេជ្រ សម្បត្តិ បានបំបែកឯកត្តកម្មចំនួនពីរ គឺ៖ ទី១- ជាកីឡាករ ប្រើពេលតិចបំផុត ក្នុងការឡើងដល់លំដាប់ A នៅកម្ពុជា (សម្រុកហាត់ ២,៥ ឆ្នាំប៉ុណ្ណោះ) និងទី២- ជាកីឡាករ ដែលមានប្រជាប្រិយភាពឡើងលឿនបំផុត ទាក់ចិត្តប្រិយមិត្ត។
យ៉ាងណាមិញ ពេលកន្លងទៅកូនសិស្សរបស់លោក ពេជ្រ សុផាន់ ក្របីព្រៃ ពេជ្រ សម្បត្តិ ធ្វើបានយ៉ាងល្អ ដោយបានប្រកួតឈ្នះជើងខ្លាំង ឃីម បូរ៉ា ដោយពិន្ទុ នៅក្នុងមហាព្រឹត្តិការណ៍ Krud Kun Khmer របស់សង្វៀនប្រដាល់ ទទក និងបានគ្រងខ្សែក្រវាត់ចំនួនពីរគឿង។
គួរបញ្ជាក់ថា ក្របីព្រៃ ពេជ្រ សម្បត្តិ ជាកីឡាករលំដាប់ A នៅកម្ពុជាហើយ ដោយសព្វថ្ងៃគាត់មានខ្សែក្រវាត់ចំនួន ៣គ្រឿង គឺខ្សែក្រវាត់ខារ៉ាបាវ ១គ្រឿង នៅសង្វៀនបាយ័ន និងខ្សែក្រវាត់គ្រុទ ២គ្រឿង នៅសង្វៀន ទទក ហើយរូបគេក៏បានឈ្នះឡានមួយគ្រឿង ក្នុងកម្មវិធីគុនខ្មែរអលស្តារផងដែរ៕