ពេជ្រ សិង្ហៈ បានយកបងប្រុសរបស់ខ្លួនធ្វើជាគំរូ ដើម្បីភាពជោគជ័យនៅថ្ងៃមុខ
កីឡាករវ័យក្មេង ពេជ្រ សិង្ហៈ ដែលបានដាក់ចិត្តខិតខំប្រឹងប្រែងហ្វឹកហាត់ ដើម្បីទទួលជោគជ័យដូចបងប្រុសបង្កើតរបស់ខ្លួនគឺកីឡាករក្របីព្រៃ ពេជ្រ សម្បត្តិ ដែលជោគជ័យខ្លាំងក្នុងអាជីពប្រដាល់របស់ខ្លួន ហើយ ពេជ្រ សិង្ហៈ បានសម្រេចចិត្តចូលប្រឡូកគុនខ្មែរ ដោយមិនមានភាពស្ទាក់ស្ទើរនោះទេ ពីព្រោះរូបគេមានចិត្តស្រឡាញ់គុនខ្មែរតាំងពីក្មេង និងតែងតែមើលបងប្រុសរបស់ខ្លួនប្រកួតជំរុញឲ្យរូបគេចាប់អាជីពជាអ្នកប្រដាល់ដែល។
ពិតណាស់ ពេជ្រ សិង្ហៈ បានប្រាប់និយាយថា៖ “ដំបូង ខ្ញុំមើលបងប្រុសរបស់ខ្ញុំប្រកួត ហើយខ្ញុំក៏ចង់ប្រកួតដែរ ខ្ញុំមានចិត្តស្រឡាញ់គុនខ្មែរខ្លាំង ពេលឃើញបងប្រុសប្រកួតបានចំណូលជួយគ្រួសារ ឃើញបែបនេះខ្ញុំក៏សុំឪពុកម្តាយទៅហាត់ប្រដាល់ជាមួយបងប្រុសដែល ហើយសម្រាប់ឪពុកម្តាយរបស់ខ្ញុំគាត់បានអប់រំណែនាំខ្ញុំឲ្យតស៊ូអត់ធ្មត់ក្នុងការហ្វឹកហាត់ ចំពោះបងប្រុសរបស់ខ្ញុំ គាត់តែងតែប្រាប់ខ្ញុំថាក្នុងនាមជាអ្នកកីឡាយើងត្រូវអត់ធ្មត់ស៊ូទ្រាំប្រឹងប្រែងហ្វឹកហាត់ហើយគោរពវិន័យក្លិបនិងស្តាប់ដំបូន្មានគ្រូទើបយើងទទួលបានជោគជ័យ”។
យ៉ាងណាមិញ ក្នុងការហ្វឹកហាត់នៅក្លិបប្រដាល់គុនខ្មែរ ពេជ្រ សុផាន់ កីឡាករ ពេជ្រ សិង្ហៈ មិនសូវជួបបញ្ហាលំបាកទេ ពីព្រោះរូបគេត្រូវបានបងប្រុសបង្កើតកីឡាករ ពេជ្រ សម្បត្តិ ជួយជ្រោមជ្រែង និងណែនាំជាប្រចាំ ហើយឪពុកម្ដាយក៏គាំទ្រឲ្យខ្ញុំចាប់អាជីពប្រដាល់ដែរ នេះក៏ជាកត្តាមួយធ្វើឲ្យខ្ញុំមានកម្លាំងដើម្បីអនាគតរបស់ខ្ញុំ។
គួរបញ្ជាក់ផងដែរថា កីឡាករ ពេជ្រ សិង្ហៈ ធ្វើបានយ៉ាងល្អក្នុងការប្រកួតមិត្តភាពអន្តរជាតិលើកដំបូងក្នុងកម្មវិធីគុនខ្មែរអលស្តារវគ្គ ៨ ដោយផ្តួលកីឡាករ ឡាវ ក្នុងទឹកទី២៕