ឈុត សេរីវ៉ាន់ថង បានឆ្លើយតបទៅ អេលីត សាន់ វិញថា ចង់លេងក្បាច់អ្វីក៏បានដែល…
ជើងខ្លាំងគុនខ្មែរទម្ងន់ ៦០គីឡូក្រាម ៤រូបត្រូវប្រជែងគ្នាដើម្បីរង្វាន់រថយន្តថ្មីសន្លាង ១គ្រឿងពីភេសជ្ជៈប៊ូសស្ត្រង នៅថ្ងៃទី១១ ខែតុលា ឆ្នាំ២០២៣ នៅវិមានពហុកីឡដ្ឋានជាតិអូឡាំពិក ដែលចូលទស្សនាដោយសេរី ហើយបេក្ខភាពទាំង ៤រូបសុទ្ធតែជើងខ្លាំងជួរមុខ ក្នុងនោះមានដូចជា៖ ឃីម បូរ៉ា, ទូច ដេវីត, ឈុត សេរីវ៉ាន់ថង និង អេលីត សាន់ ដោយបេក្ខភាពទាំង ៤រូបនេះកំពុងទទួលបានការចាប់អារម្មណ៍យ៉ាងខ្លាំងពីអ្នកគាំទ្រ ហើយក៏មានសង្គ្រាមពាក្យសំដីផ្ទុះដាក់គ្នារវាងកីឡាករនឹងកីឡាករផងដែរ។
ពិតណាស់ ក្នុងនោះគេឃើញកីឡាករពូកែបុក អេលីត សាន់ បានប៉ះសំដីគ្នាជាមួយអ្នកលេងក្បាច់ ឈុត សេរីវ៉ាន់ថង ដោយ អេលីត សាន់ ចង់ជួប ឈុត សេរីវ៉ាន់ថង នៅវគ្គផ្តាច់ព្រ័ត្រ ដើម្បីជម្រុះបញ្ជីចាស់ និងចង់ឲ្យកីឡាករមកពីខេត្តបាត់ដំបងម្នាក់នេះវ៉ៃបុក ពោលគឺមិនត្រូវព្យាយាមថយក្រោយដូចមុខឡើយ។
យ៉ាងណាមិញ ម្ចាស់មេដាយមាសស៊ីហ្គេម ឈុត សេរីវ៉ាន់ថង ក៏បានឆ្លើយតបនឹងការចង់បានរបស់ អេលីត សាន់ ថា៖ “បុកក៏បាន ថយក៏បាន ក្បាច់គុនខ្មែរមានច្រើនទម្រង់ ច្រើនក្បាច់ ច្រើនស្នៀត អ្នកខ្លាំងពិតគឺចេះវាយគ្រប់ដាន”។
គួរបញ្ជាក់ផងដែរថា អ្នកទាំងពីរធ្លាប់ប៉ះគ្នាចុងក្រោយ កាលពីខែមិថុនា ដែលកាលនោះ ឈុត សេរីវ៉ាន់ថង ឈ្នះដោយពិន្ទុ ដើម្បីទទួលបានខ្សែក្រវាត់ដែលមានប្រាក់រង្វាន់ ១ម៉ឺនដុល្លារ និងខ្សែកមាស ២តម្លឹង ហើយការប្រកួតនោះ អេលីត សាន់ ជាអ្នកដើរចូលវ៉ៃ ប៉ុន្តែធ្វើអ្វីមិនបានលើ សេរីវ៉ាន់ថង ដែលព្យាយាមប្រើបច្ចេកទេស ថយក្រោយ និងវ៉ៃយកពិន្ទុ៕
