សុខ ធី ថា អ្នកគាំទ្រខ្មែរខុសពីថៃ នៅថៃបើគេបិទលេងលុយលែងមានអ្នកមើលប្រដាល់ហើយ
ជើងខ្លាំងគុនខ្មែរ សុខ ធី ហៅ កាកា បាននិយាយថា៖ ចំពោះអ្នកគាំទ្រកម្ពុជាគឺល្អ និងមានចំនួនច្រើន ខុសពីអ្នកគាំទ្រនៅប្រទេសថៃ ប្រសិនបើខាងប្រទេសថៃគេបិទលែងឲ្យលេងលុយ (ភ្នាល់លុយ) អាចនឹងលែងមានអ្នកចូលមើលប្រដាល់ដូចគ្នា ហើយកម្ពុជាមានអ្នកគាំទ្រប្រដាល់ច្រើន និងចូលចិត្តទៅទស្សនាផ្ទាល់ អាចនិយាយថា គាំទ្រចេញពីបេះដូង ខុសពីខាងប្រទេសថៃ អ្នកគាំទ្រភាគច្រើនគឺទៅលេងលុយ។
ពិតណាស់ ពាក់ព័ន្ធនិងការផ្សព្វផ្សាយក្បាច់គុនវិញ កីឡាករមានដើមកំណើតមកពីខេត្តបន្ទាយមានជ័យ រូបនេះបានបញ្ជាក់ថា៖ បច្ចុប្បន្នកីឡាករកម្ពុជាគឺល្អហើយ ប៉ុន្តែភាគច្រើនគឺប្រកួតនៅតែក្នុងប្រទេស ប្រសិនបើចេញទៅប្រកួតនៅបរទេសបានច្រើននោះរឹតតែល្បី និងមានគេស្គាល់ច្រើនជាងនេះទៅទៀត។
គួរបញ្ជាក់ផងដែរថា សុខ ធី ជាកីឡាករល្បីឈ្មោះមួយរូបទាំងនៅក្នុងប្រទេសកម្ពុជា និងប្រទេសថៃ ហើយរូបគេធំធាត់ និងប្រឡូកប្រដាល់ជាយូរឆ្នាំមកហើយក្នុងប្រទេសថៃ ដោយបច្ចុប្បន្ននេះ សុខ ធី បានវិលកម្ពុជាវិញជាមួយភរិយា និងកូនប្រុស ដោយកំពុងរួមរស់ជាមួយក្លឹបប្រដាល់ Kun Khmer International Fight Gym (KKIF) របស់លោកឧកញ៉ា ស្រី ចាន់ថន ហើយថ្ងៃអាទិត្យ ទី២២ ខែតុលា ឆ្នាំ២០២៣ នេះ រូបគេនឹងត្រូវប្រកួតម៉ារ៉ាតុងនៅសង្វៀន Town ទៀតផង៕
