គួរឲ្យសរសើរមែន! ធឿន ធារ៉ា វ៉ៃដោយទំនុកចិត្ត បានផ្តួល អាប៊ូហ្វាហ្ស៊ីល សន្លប់ធំនៅក្នុងទឹកទី២
អ្នកលេងពូថៅដៃ ធឿន ធារ៉ា បានប្រើពេលត្រឹមតែ ២ទឹកប៉ុណ្ណោះ ដើម្បីផ្តួលកីឡាករអុីរ៉ង់ អាប៊ូហ្វាហ្ស៊ីល ហ្គូដាហ្ស៊ី ឲ្យសន្លប់ធំក្នុងទឹកទី២ នៅកម្មវិធីប្រកួតគូបូតា យប់ថ្ងៃសុក្រ ទី២០ ខែតុលា ឆ្នាំ២០២៣ នៅសង្វៀនបាយ័ន ស្ទឹងមានជ័យ។
ពិតណាស់ ការប្រកួតនេះ ធឿន ធារ៉ា ពិតជាមានទំនុកចិត្តខ្លាំងណាស់ ដោយបានដើរចូលវ៉ៃ និងចេញអាវុធមួយដៃៗ ច្បាស់ៗ និងមិនខ្លាចញញើតដៃគូឡើយ សូម្បីតែការប្រកួតមុនៗក៏រូបគេបង្ហាញសមត្ថភាពយ៉ាងល្អទាំងបច្ចេកទេស និងស្មារតីប្រយុទ្ធដែលគួរឲ្យចាប់អារម្មណ៍សម្រាប់អ្នកគាំទ្រដែរ។
យ៉ាងណាមិញ មហាព្រឹត្តិការណ៍គុនខ្មែរ នៅថ្ងៃទី ៥ ខែវិច្ឆិកា ឆ្នាំ២០២៣ ឃើញបងប្អូនបានចុចឈ្មោះបន្ថែមស្នើសុំឲ្យមានជំនួប ធឿន ធារ៉ា និង Ricardo Bravo ម្ដងទៀត ខណៈ ធឿន ធារ៉ា ធ្លាប់បានចាញ់កីឡាកររូបនេះ សន្លប់នៅប្រទេសជប៉ុន ស្របពេលថ្មីៗនេះ ធារ៉ា កំពុងឡើងជើងខ្លាំងមិនធម្មតា។
គួរបញ្ជាក់ផងដែរថា កាលពីថ្ងៃសុក្រ ទី២០ ខែតុលា ឆ្នាំ២០២៣ នៅសង្វៀនបាយ័ន ស្ទឹងមានជ័យ ធឿន ធារ៉ា បានផ្តួល កីឡាករអុីរ៉ង់ អាប៊ូហ្វាហ្ស៊ីល ហ្គូដាហ្ស៊ី ក្នុងទឹកទី២ នៅកម្មវិធីប្រកួតគូបូតា៕
