មួយរយ:ពេលចុងក្រោយនេះ ព្រំ សំណាង បង្ហាញការហ្វឹកហាត់សកម្មជាមួយគ្រូ ១០រូប តែមើលទៅ Leduc ហាក់ស្ងប់ស្ងាត់ឈឹង
មួយរយ:នេះ ព្រំ សំណាង បង្ហាញសកម្មហ្វឹកហាត់ជាមួយគ្រូ ១០រូប តែមើលទៅស្តេចប្រដាល់មីយ៉ាន់ម៉ា Dave Leduc ហាក់មិនបង្ហាញសកម្មភាពហ្វឹកហាត់អ្វីគួរឲ្យកត់សំគាល់នោះទេ ក្រៅពីការបង្ហោះខិត្តប័ណ្ណផ្សព្វផ្សាយពីកម្មវិធីប្រកួតនៅថ្ងៃទី៥ ខែវិច្ឆិកា ឆ្នាំ២០២៣ ជាមួយអ្នកលេងគុនខ្មែរ ព្រំ សំណាង ប៉ុណ្ណោះ។
ពិតណាស់ កាលពីថ្ងៃទី២៥ ខែតុលា ឆ្នាំ២០២៣ កន្លងទៅគ្រូធំ និងគ្រូជំនួយទាំង ១០រូប បានមកជួបជុំគ្នានៅក្លិបហ្វឹកហាត់ក្នុងផ្សារទំនើបអូឡាំព្យា ដោយពួកគាត់បានទស្សនា និងវិភាគវីដេអូប្រកួតរបស់ Dave Leduc ដោយគ្រូម្នាក់ៗចាប់ចំណុចខ្លាំង និងចំណុចខ្សោយរបស់អ្នកប្រដាល់មីយ៉ាន់ម៉ា ដើម្បីត្រៀមក្បាច់វ៉ៃ និងការពារ ជាពិសេសនោះមានវីដេអូឃ្លីបខ្លះត្រូវបានបង្ហាញជាសាធារណៈ ដែលឃើញលោកគ្រូ នួន ភារម្យ និងលោកគ្រូ អេ ភូថង បង្ហាញស្នៀតពិសេសៗដល់ ព្រំ សំណាង ដែលមើលទៅពិតជាគួរឲ្យចាប់អារម្មណ៍ណាស់។
យ៉ាងណាមិញ ងាកទៅមើលស្តេចប្រដាល់មីយ៉ាន់ម៉ា Dave Leduc ហាក់មិនបង្ហាញសកម្មភាពហ្វឹកហាត់ឡើយ ដោយមួយរយៈពេលចុងក្រោយមកនេះ កីឡាករមីយ៉ាន់ម៉ា Dave Leduc តែងតែមានសង្គ្រាមពាក្យសំដីជាមួយកីឡាករកម្ពុជានៅលើបណ្តាញទំនាក់ទំនងសង្គម សូម្បីតែអ្នកគាំទ្រសួរ ឬមានមតិតាមបណ្តាញសង្គមក៏រូបគេឆ្លើយតបដែរ។
គួរបញ្ជាក់ផងដែរថា គ្រូបង្វឹកទាំង ១០រូបសុទ្ធតែជាអតីតជើងខ្លាំងគុនខ្មែរ និងជាគ្រូបង្វឹកមកពីក្លិបផ្សេងៗគ្នា ដោយពួកគាត់បានជួបជុំគ្នាសិក្សា វិភាគដៃគូប្រកួត បង្ហាត់ស្នៀតពិសេសៗតាមជំនាញរបស់គ្រូបង្វឹកម្នាក់ៗ ការថែមទាំសុខភាព និងរាងកាយឲ្យបានល្អដិតដល់ ដោយគ្រូបង្វឹកទាំង ១០រូបនោះមានដូចជា៖
- សេន ប៊ុនថេន
- ពេជ្រ សុផាន់
- ប៉ឹត ខាំ
- ឡៅ ស៊ីណាត
- វង្ស ស៊ីថៃ
- នួន ភារម្យ
- អេ ភូថង
- វ៉ន វីវ៉ា
- ម៉ាក់ សាមឿន
- ជា ស្រួច៕
