អស្ចារ្យណាស់! ពង្រឹងគុនខ្មែរនៅអូស្ត្រាលី ឲ្យរឹងមាំ រួចជ្រៀតចូលអូឡាំពិក ឆ្នាំ២០៣២ ទៀតផង
សហព័ន្ធកីឡាគុនខ្មែរអន្តរជាតិ ចាប់ផ្តើមពង្រឹងសហព័ន្ធគុនខ្មែរនៅអូស្ត្រាលី ឲ្យរឹងមាំ ក្នុងគោលបំណងជ្រៀតខ្លួនចូលកីឡាអូឡាំពិករដូវក្តៅ ឆ្នាំ២០៣២ ដែលរៀបចំនៅទីក្រុង ប្រ៊ីសបេន ប្រទេសអូស្ត្រាលី ហើយនេះជាការអះអាងរបស់លោក វ៉ាត់ ចំរើន អគ្គលេខាធិការគណៈកម្មាការអូឡាំពិកកម្ពុជា (NOCC)។
ពិតណាស់ គោលដៅរបស់ NOCC និងសហព័ន្ធកីឡាគុនខ្មែរអន្តរជាតិ លោក វ៉ាត់ ចំរើន មានមហិច្ឆតា ក្នុងការដាក់គុនខ្មែរទៅក្នុងកីឡាអូឡាំពិក និងផ្សព្វផ្សាយទៅកាន់ពិភពលោក ដោយបច្ចុប្បន្ន សហព័ន្ធកីឡាប្រដាល់គុនខ្មែរអន្ដរជាតិ មានសមាជិកជាង ៦០ប្រទេស ហើយអគ្គលេខាធិការរូបនេះ រំពឹងថា កីឡាប្រដាល់គុនខ្មែរ អាចនឹងមានវត្តមាននៅកីឡាអូឡាំពិក ក្នុងឆ្នាំ២០៣២ នាពេលខាងមុខនេះ។
យ៉ាងណាមិញ ក្រោយសន្និសីទសារព័ត៌មានការប្រកួតគុនខ្មែរជ្រើសរើសជើងឯកពិភពលោក លើកទី៤ ដែលគ្រោងធ្វើឡើងនៅថ្ងៃទី២៦ ដល់ទៅ២៨ ខែវិច្ឆិកា នៅខេត្តសៀមរាប រដ្ឋលេខាធិការក្រសួងអប់រំ យុវជន និងកីឡារូបនេះ បានប្រាប់អ្នកសារព័ត៌មានថា៖ សហព័ន្ធកីឡាគុនខ្មែរអន្តរជាតិ នឹងពង្រឹងគុនខ្មែរនៅអូស្ត្រាលី ឲ្យកាន់តែរឹងមាំ ដើម្បីជ្រៀតខ្លួនចូលកីឡាអូឡាំពិករដូវក្តៅ ឆ្នាំ២០៣២ ដែលរៀបចំនៅទីក្រុងប្រ៊ីសបេន ប្រទេសអូស្ត្រាលី ក្រៅពីពង្រឹងនៅអូស្ត្រាលី ទាំងសហព័ន្ធ និង NOCC ត្រូវមានយុទ្ធសាស្ត្របន្តបន្ទាប់ផងដែរ។
ក្នុងនោះលោក វ៉ាត់ ចំរើន ក៏បាននិយាយថា៖ “ប្រទេសជាសមាជិកគុនខ្មែរ ជំរុញយើងឲ្យឈានចូលកម្រិតអាស៊ី Asian Games ដែលស្ថិតក្រោមការគ្រប់គ្រងរបស់អូឡាំពិកអាស៊ី (OCA) ដែលមាន ៤៥ប្រទេស ព្រោះយើង ត្រូវបានគេទទួលស្គាល់ ជាកម្រិតក្បាច់គុន ក្នុងការប្រកួតពហុកីឡា និងបានបង្ហាញខ្លួនរួចហើយនៅស៊ីហ្គេម ហើយយុទ្ធសាស្ដ្រចុងក្រោយ គឺរុញគុនខ្មែរឲ្យដល់អូឡាំពិក តែម្តង នៅឆ្នាំ២០៣២”។
លោក វ៉ាត់ ចំរើន បានបន្ថែមទៀតថា៖ “មុនឈានដល់ដំណាក់កាលនេះ ប្រជាពលរដ្ឋដែលជាម្ចាស់ក្បាច់គុនរបស់ខ្លួន ត្រូវតែបង្ហាញការគាំទ្រ អភិរក្ស អភិវឌ្ឍន៍ ទាំងអស់គ្នាជាមុនសិន ទើបអ្វីៗសម្រេចបានផ្លែផ្កា ហើយការប្រកួតគុនខ្មែរជ្រើសរើសជើងឯកពិភពលោកលើកទី៤ ឆ្នាំ២០២៣ ដែលនឹងរៀបចំឡើងនៅមុខប្រាសាទអង្គរ ពីថ្ងៃទី២៦ ដល់២៨ ខែវិច្ឆិកា ជាផ្នែកមួយក្នុងការផ្សព្វផ្សាយប្រដាល់ដូនតាខ្មែរនេះ ទៅកាន់ពិភពលោក ព្រឹត្តិការណ៍នេះ ត្រូវរៀបចំឲ្យបានទៀងទាត់ ដើម្បីឲ្យស្របតាមគោលការណ៍ឈានទៅឲ្យ (OCA) ទទួលស្គាល់ មុនដល់កម្រិតអូឡាំពិក”។
